सोलापूर : पोलीस अधीक्षक अतुल कुलकर्णी (सोलापूर ग्रामीण) यांनी श्री क्षेत्र पंढरपूर येथे आषाढीवारी यात्रा 19 जुलै ते 29 जुलै 2026 या कालावधीत भरत आहे. यात्रेचा मुख्य दिवस 24 जुलै दशमी, 25 जुलै देवशयनी आषाढी एकादशी आणि 29 जुलै पौर्णिमा असा आहे. आषाढीवारी कालावधीमध्ये मोठ्या प्रमाणात वारकरी/भाविक लोक श्री क्षेत्र पंढरपूर येथे येत असतात.
तसेच देशात, राज्यात व महत्त्वाच्या शहरे, धार्मिक व पर्यटन स्थळे इ. ठिकाणी दहशतवादी कारवायात सातत्याने वाढ होत असल्याचे दिसून येत आहे. दहशतवादी कारवाया करणारे दहशतवादी हे स्थानिक लोकात मिसळून तात्पुरत्या स्वरुपात वास्तव्य करुन घातपाती कारवायांना अंतिम रुप देतात. त्यामुळे मोठ्या प्रमाणात मानवी जिवीताचे आणि मालमत्तेचे नुकसान होत असून त्याचबरोबर अशा घटनांमुळे जनमाणसात घबराटीचे तसेच असुरक्षिततेचे वातावरण निर्माण होऊन कायदा व सुव्यवस्थेचा प्रश्न निर्माण होणाऱ्या घटना वारंवार घडत आहेत.
या दहशतवादी कारवायामध्ये दहशतवादी हे जुनी वाहने, तसेच इतर वस्तूंचा वापर केल्याचे यापूर्वी आढळले आहे. तसेच ते अशा कारवायाच्या वेळी रुम/फ्लॅट/लॉज भाड्याने घेऊन राहतात. मस्जिद, चर्च, धर्मशाळा येथे आश्रय घेतात किंवा ती जागा विकत किंवा लिजने घेतात. त्यासाठी ते स्थानिक ओळख म्हणून प्रॉपर्टी डिलर/ब्रोकर/एजंन्ट जुने वाहन खरेदी-विक्री करणारे दुकानदार यांची मदत घेतात.
जिल्ह्यातील नविन राहण्यासाठी येणारे व्यक्ती, यांची माहिती असणे अत्यंत गरजेचे आहे. म्हणून सोलापूर जिल्ह्यातील आपल्या स्थळ सिमा हद्दीत जी-जी व्यक्ती नव्याने राहण्यासाठी येईल, त्या व्यक्तीस व जे कोणी अशा व्यक्तीस राहण्यास जागा उपलब्ध करुन देईल, असे घरमालक, प्रॉपर्टी डिलर, ब्रोकर, एजंन्ट, मस्जिद, चर्च, धर्मशाळा इत्यादीचे विश्वस्त यांना अशा अनोळखी नविन राहावयास आलेल्या व्यक्तींची त्यांच्या वास्तव्यासंबंधीची संपूर्ण माहिती न चुकता तो राहावयास आल्यानंतर किंवा विचारपूस केल्यावर लगेच संबंधीत पोलीस ठाणेला देणे गरजेचे आहे. 
जेणेकरुन भविष्यात होणाऱ्या दहशतवादी कारवाईस, गुन्ह्यास प्रतिबंध होऊ शकतो, ज्यायोगे सार्वजनिक कायदा व सुव्यवस्थेचा प्रश्न अबाधित राहण्यास सहाय्य होईल. तसेच लोकांमध्ये विश्वासाचे वातावरण निर्माण होऊन सार्वजनिक शांतता वाढीस लागण्यास बळ मिळेल. तरी वरील नमुद सर्व परिस्थितीचा विचार करुन याकरीता सोलापूर ग्रामीण जिल्ह्यात व सर्व नगरपालिका हद्दीत, 08 जूनपासून पुढे 60 दिवस कालावधीत भारतीय नागरीक सुरक्षा संहिता 2023 चे कलम 163 प्रमाणे घोषणापत्र लागू होण्यास विनंती करण्यात आली आहे.
ज्याअर्थी असा आदेश काढण्यापूर्वी जिल्ह्यातील सर्व लॉज, हॉटेल, फ्लॅट, दुकाने, घर/जागा धार्मिक स्थळांचे विश्वस्त वा काळजीवाहक, प्रॉपर्टी डिलर, ब्रोकर, एजंट, जुने घर खरेदी विक्री करणारे व्यक्ती व संस्था तसेच भाड्याने घर देणारे व्यक्ती व संस्था/घर मालकांना नोटीस देऊन त्यांची बाजू ऐकणे शक्य नसल्याने एकतर्फी आदेश काढणे आवश्यक असल्याने अपर जिल्हादंडाधिकारी अभिजीत पाटील यांच्या भारतीय नागरीक सुरक्षा संहिता 2023 चे कलम 163 अन्वये प्रदान करण्यात आलेल्या शक्तीचा वापर करुन आदेश दिला आहे की, सोलापूर ग्रामीण जिल्ह्यातील सर्व लॉज, हॉटेल, फ्लॅट, दुकाने, घरमालक, प्रॉपर्टी डिलर / ब्रोकर / एजंट, जुने घर विक्री-खरेदी करणारे व्यक्ती व संस्था, भाडयाने घर देणारे व्यक्ती व संस्था तसेच धार्मिक स्थळांचे विश्वस्त व काळजीवाहक यांना खालील कृत्यांना बंदी घालत आहे.
आषाढीवारी कालावधीत फ्लॅट, लॉज, मठ, धर्मशाळा, चर्च, मशिद, मंदिर व खाजगी निवासस्थाने या ठिकाणी अनोळखी अथवा संशयित इसमास त्याची ओळख पटवल्याशिवाय राहण्यास परवानगी देऊ नये. भाडेकरुकडून रहिवाशी व ओळख असलेला पुरावा इत्यादी कागदपत्रांच्या छायांकीत प्रती घ्याव्यात.
आषाढीवारी कालावधीत स्फोटक पदार्थ, बार उडणारे पदार्थ सोबत बाळगू नये. तसेच गॅस, केरोसीन, डिझेल, पेट्रोल याचा वापर अत्यंत काळजीपूर्वक करुन सुरक्षित ठिकाणी ठेवावीत.
हा आदेश हा दिनांक-08 जूनपासून पुढे 60 दिवस सोलापूर जिल्ह्याच्या ग्रामीण हद्दीत (पोलीस आयुक्तालय हद वगळून) व सर्व नगरपालिका हद्दीत लागू राहील, असे आदेश अपर जिल्हादंडाधिकारी अभिजीत पाटील यांनी दिले आहेत.
**
