सोलापूर : अक्कलकोट उत्तर पोलीस ठाण्याकडील दाखल गुन्ह्यात वाहन वापरल्याचा संशय असल्यावरून ताब्यात घेतलेले वाहन आणि मोबाईल परत देण्यासाठी दोन पोलीस अंमलदारांनी तडजोडी अंती 1, 20,000 रुपयांची लाच खाजगी इसमाच्या हस्ते स्विकारताना मंगळवारी सकाळी रंगेहाथ पकडण्यात आलंय. अक्कलकोट उत्तर पोलीस ठाण्यात या तिघा आरोपींविरुद्ध गुन्हा दाखल करण्याची प्रक्रिया सुरू असल्याचं सांगण्यात आलंय.
लोकसेवक पोलीस हवालदार/567 राजशेखर रामचंद्र कोळी, पोकॉ/619 लक्ष्मीकांत दत्तात्रय देडे ( दोघे-नेमणुक अक्कलकोट उत्तर पोलीस ठाणे, सोलापूर ग्रामीण आणि रा. अशोक चौक, सोलापूर) यांनी संशयावरून तक्रारदार यांची स्कॉर्पिओ गाडी काढून घेतली होती.
त्याच वेळी लोकसेवक पोलीस हवालदार कोळी व पोकॉ देडे यांनी तक्रारदाराचे वडील व काका यांना या गुन्ह्यात नाव टाकून अटक करतो, अशी धमकीही दिली . ती गाडी आणि मोबाईल परत देण्याबरोबरच तक्रारदार यांचे वडील व काकांना जामीन करुन देण्यासाठी लोकसेवक पोलीस हवालदार कोळी व पोकॉ देडे यांनी खाजगी इसम आकाश शरण्णाप्पा काडरामे (वय-33 वर्षे, रा. आझाद गल्ली, अक्कलकोट) याच्याकरवी सुरुवातीला 1, 40,000 रुपयांची लाच रक्कमेची मागणी केली होती.
त्यात तडजोडीअंती 1, 20,000 रुपये खाजगी इसम आकाश काडरामे याच्याकडे देण्याचे ठरले होते. या प्रकरणी लाचलुचपत प्रतिबंधक विभाग सोलापूर कार्यालयाकडं तक्रार आल्यावर, त्याची पडताळणी करून मंगळवारी सकाळी अक्कलकोट उत्तर पोलीस ठाण्यासमोर एसीबीच्या पथकानं सापळा रचला होता. त्यात खाजगी इसम आकाश काडरामे हा लोकसेवक पोलीस हवालदार कोळी व पोकॉ देडे यांच्याकरीता स्विकारताना रंगेहाथ सापडला. अक्कलकोट उत्तर पोलीस ठाण्यात या त्रिकुटाविरुद्ध गुन्हा दाखल करण्याची प्रक्रिया सुरू असून पोलीस निरीक्षक रविंद्र लांभाते यांच्याकडं या गुन्ह्याचा पुढील तपास सोपविण्यात आला आहे.
