जिजाऊ ज्ञान मंदिर मध्ये महापरिनिर्वाण दिन साजरा
कोंडी : डॉक्टर बाबासाहेब आंबेडकर एक थोर महामानव आणि जागतिक पातळीवरील विद्वान होते, त्यांचे विचार घेऊन आपण पुढे आलो तर निश्चितच आपल्या जीवनामध्ये आमुलाग्र बदल झाल्याशिवाय राहणार नाही, असे मत प्रा. एन. के. भोसले यांनी यावेळी बोलताना व्यक्त केले.
उत्तर सोलापूर तालुक्यातील मौजे कोंडी येथील जाणता राजा बहुउद्देशीय शिक्षण प्रसारक मंडळ संचालित जिजाऊ ज्ञान मंदिर येथे भारतरत्न डॉक्टर बाबासाहेब आंबेडकर यांचा महापरिनिर्वाण दिन साजरा करण्यात आला. याप्रसंगी प्रा. भोसले बोलत होते.
संस्थापक अध्यक्ष गणेश निळ आणि प्राचार्य सुषमा निळ यांच्या मार्गदर्शनाखाली झालेल्या या कार्यक्रमात भारतरत्न डॉक्टर बाबासाहेब आंबेडकर यांच्या प्रतिमेचे पूजन प्राध्यापक एन. के. भोसले यांच्या हस्ते करण्यात आले. या कार्यक्रमाच्या अध्यक्षस्थानी मुख्याध्यापिका अर्चना औरादे होत्या.
कार्यक्रमाचे प्रास्ताविक तसंच सूत्रसंचालन कांबळे मॅडम यांनी केले. यावेळी महापरिनिर्वाण दिनाच्या निमित्तानं अनेक चिमुकल्यांनी त्यांच्या शैलीत डॉ. बाबासाहेबांच्या जीवनातील अनेक प्रसंगावर विचार मांडले. याप्रसंगी दादासाहेब नीळ यांची प्रमुख उपस्थिती होती.
डॉ. बाबासाहेब आंबेडकर यांच्या विचारांचे पाईक होण्याची गरज असल्याचे मत मुख्याध्यापिका अर्चना औरादे यांनी अध्यक्षस्थानावरून बोलताना व्यक्त केले.
यावेळी सर्व शिक्षक वृंद आणि शिक्षक-शिक्षकेतर कर्मचारी संख्येने उपस्थित होते.
