सोलापूर : येथील ज्येष्ठ पत्रकार, दैनिक 'लोकसत्ता' चे प्रतिनिधी एजाजहुसेन मुजावर यांचे अल्पशः आजाराने निधन झालं. ते मृत्यूसमयी 59 वर्षीय होते. अक्कलकोट रस्त्यावरील जडेसाब बंगला कब्रस्थानात त्यांच्या पार्थिवाचा दफनविधी (सुपुर्द-ए-खाक) संध्याकाळी 07.30 पार पडला. यावेळी पत्रकारिता, राजकीय, सामाजिक आणि शैक्षणिक क्षेत्रातील अनेकांची उपस्थिती होती.
थोरला मंगळवेढा तालीम, उत्तर कसबा येथील रहिवासी एजाजहुसेन मुजावर अभ्यासू आणि व्यासंगी पत्रकार होते. संचारपासून त्यांनी पत्रकारितेला सुरुवात केली. स्व.रंगाअण्णा वैद्य यांच्या मार्गदर्शनाखाली त्यांनी पत्रकारितेचे धडे गिरवले. जिल्ह्यातील विविध राजकीय पक्षांच्या नेत्यांशी त्यांचा थेट संपर्क होता. गेल्या ३८ वर्षांचा त्यांचा पत्रकारितेचा प्रवास आज संपला.
सोलापूर शहरातील राजकीय, सामाजिक घटनांची त्यांच्याकडे खडानखडा माहिती होती. एका अर्थाने सोलापूर शहर आणि जिल्ह्यातील घडामोडींचा संदर्भ ग्रंथ म्हणूनच त्यांच्याकडं पाहिलं जात होतं.
नि:स्पृह , निरपेक्ष, धाडसी पत्रकारितेचा मानदंड असा त्यांचा लौकिक होता. शहर, जिल्ह्यातील राजकीय नेते त्यांचा सल्ला घेत असत तर नवोदित पत्रकार कोणताही संदर्भ त्यांच्याकडून जाणून घेत असत.
गेल्या तीन महिन्यापूर्वी त्यांना विस्मृतीचा आजार जडला. वैद्यकीय तपासणी मेंदूवर गाठ असल्याचे निष्पन्न झाले. त्यांना तातडीने मुंबईस्थित रिलायन्स हॉस्पिटलमध्ये दाखल करून शस्त्रक्रिया करण्यात आली. मात्र मागील आठवड्यापासून त्यांना पुन्हा त्रास सुरू झाला. आज सकाळीच सोलापूरच्या शासकीय रुग्णालयात दाखल केलं होतं, मात्र गुरुवारी सकाळी त्यांची प्राणजोत मालवली. त्यांच्या पश्चात पत्नी, दोन मुली, मुलगा असं कुटुंब आहे.
