सोलापूर : कोजागिरी पोर्णिमेनिमित्त आई तुळजाभवानीच्या दर्शनासाठी तुळजापूरकडे पायी चालत जाणार्या भाविक भक्तांसाठी विश्व हिंदु महासंघाच्या वतीने सोलापूर-तुळजापूर रस्त्यावरील उळेगांवाजवळ मोफत आरोग्य तपासणी आणि औषधोपचार शिबीराचे आयोजन करण्यात आल्याची माहिती पश्चिम महाराष्ट्राचे अध्यक्ष नंदकुमार झंवर यांनी दिली.
विश्व हिंदू महासंघाचे राष्ट्रीय अध्यक्ष तथा उत्तर प्रदेशचे मुख्यमंत्री योगी आदित्यनाथ यांच्या प्रेरणेतून ही सेवा करण्यात येत आहे. शनिवारी, 04 ऑक्टोबर रोजीपासून भाविक भक्त तुळजापूरकडे पायी चालत असताना त्यांना कोणत्याही आजाराचा त्रास हो3 नये आणि त्यावर उपचार व्हावा, यासाठी हे आरोग्य शिबीर आयोजित करून भाविकांची सेवा करण्यात येणार आहे.
सोलापूर-तुळजापूर या रस्त्यावरून दरवर्षी लाखो भाविक पायी चालत तुळजापूरकडे जात असतात. यंदाही मोठ्या संख्येने भाविक जाणार आहेत, त्यांना आरोग्यासाठीचे योग्य ते उपचार मिळावेत म्हणून विश्व हिंदू महासंघाने व्यवस्था केलेली आहे. 
उळेगांवाजवळ रस्त्यावर मोठा मंडप मारून तज्ञ डॉक्टर, नर्स-आरोग्य सेवक तसेच विश्व हिंदू महासंघाचे पदाधिकारी आणि सदस्य भाविकांच्या सेवेसाठी तैनात करण्यात आलेले आहेत.
नेहमी लागणारे औषधाचा पुरवठाही यावेळी करण्यात येणार असल्याचे सोलापूर जिल्हा अध्यक्ष विनित ढेपे, सोलापूर शहर अध्यक्ष उपेंद्र दासरी, जिल्हा संघटन मंत्री शशिकांत पगडे आणि शहर संघटन मंत्री रोहित परदेशी यांनी सांगितले.
ही सेवा कोजागिरी पोर्णिमेपर्यंत राहणार असून भाविक भक्तांनी याचा लाभ घ्यावा, असं आवाहन यावेळी करण्यात आलं आहे.
