उमेदवार किंवा त्यांच्या प्रतिनिधींनी उपस्थित राहण्याचे आवाहन
सोलापूर : भारत निवडणूक आयोगाच्या निर्देशानुसार विधानसभा निवडणूक - 2024 च्या अनुषंगाने 247 मोहोळ (अ.जा.) विधानसभा मतदारसंघातून निवडणूक लढविणा-या सर्व उमेदवारांची निवडणूक खर्च लेखा तपासणी 9, 13 व 17 नोव्हेंबर रोजी करण्यात येणार आहे. सदर खर्च तपासणी वेळी उमेदवार किंवा त्यांच्या प्रतिनिधींनी उपस्थित राहावं, असं आवाहन सहा. निवडणूक निर्णय अधिकारी सचिन मुळीक यांनी केलं आहे.
लोकप्रतिनिधीत्व अधिनियम 1951 मधील कलम 77 मधील तरतुदीनुसार निवडणूक लढविणाऱ्या उमेदवारांनी त्यांच्या निवडणूक खर्चाचे अभिलेखे उपलब्ध करून देणे अपरिहार्य आहे. त्यानुसार प्रथम खर्च लेखा तपासणी शनिवार, 9 नोव्हेंबर रोजी दुपारी 02 ते सायं 06 वाजेपर्यंत, द्वितीय खर्च लेखा तपासणी बुधवार,13 नोव्हेंबर रोजी दुपारी 02 ते सायं. 06 वाजेपर्यंत तर तृतीय खर्च लेखा तपासणी रविवार, 17 नोव्हेंबर रोजी दुपारी 02 ते सायं. 06 वाजेपर्यंत मोहोळ (अ.जा.) विधानसभा मतदार संघ खर्च संनियंत्रण–मोहोळ येथे करण्यात येईल.
मोहोळ (अ.जा) विधानसभा मतदारसंघाचे निवडणूक खर्च निरीक्षक हे वरील दिनांकास व वेळेस मोहोळ (अ.जा.) विधानसभा मतदार संघ खर्च संनियंत्रण–मोहोळ येथे खर्च तपासणीकरीता उपलब्ध राहणार आहेत. जे उमेदवार खर्चाचे लेखे तपासणीकरीता सादर करणार नाही, त्यांच्यावर निवडणूक आयोगामार्फत योग्य ती कार्यवाही करण्यात येईल, याची सर्व संबंधितांनी नोंद घ्यावी, असं मोहोळ (अ.जा.) विधानसभा मतदारसंघ विधानसभा सहा. निवडणूक निर्णय अधिकारी सचिन मुळीक यांनी कळविलं आहे.
