सोलापूर : गैरकायद्याची मंडळी जमा करुन दंगा करणे, जीवे ठार मारणे, सामान्य नागरिकांना शिवीगाळ, दमदाटी - मारहाण करुन गंभीर दुखापत करणे यासारखे अनेक गुन्हे दाखल असलेल्या सतीश सुधीर क्षिरसागर (वय - ३२ वर्षे) याला सोलापूर पोलीस आयुक्तालयाने पोलीस आयुक्तालय हद्द उर्वरित सोलापूर जिल्हा व धाराशिव जिल्ह्यातून दोन वर्षांकरिता हद्दपार केलंय.
सतीश सुधीर क्षिरसागर (रा. न्यु बुधवार पेठ, सोलापूर) याच्याविरुध्द सन २०१२ ते २०२३ या कालावधीमध्ये अनेक गुन्हे दाखल आहेत. त्याच्याविरुद्ध जोडभावी पेठ पोलीस ठाण्याकडून महाराष्ट्र पोलीस अधिनियम १९५१ कलम ५६ (१) (अ) (ब) अन्वयेचा तडीपार प्रस्ताव पोलीस उप-आयुक्त (परिमंडळ) यांना सादर करण्यात आला होता.
त्या प्रस्तावाच्या अनुषंगाने पोलीस उप-आयुक्त (परिमंडळ) विजय कबाडे यांनी कार्यवाही करुन, त्यांच्याकडील तडीपार आदेश क्र. ८१२/ २२ मार्च २०२४ अन्वये सतीश क्षिरसागर यास सोलापूर व धाराशीव जिल्हा येथून दोन वर्षाकरीता २५ मार्चपासून तडीपार केलं आहे. त्यास तडीपार केल्यानंतर निगडी, पिंपरी चिंचवड येथे सोडण्यात आलं आहे.
