अप्पर जिल्हाधिकारी मोनिका सिंग यांच्या हस्ते उर्दू घरचे लोकार्पण
सोलापूर : उर्दू भाषेवर प्रेम करणाऱ्या सर्व सोलापूरकर नागरिकांनी उर्दू घराची उभारणी करण्याचा जास्तीत-जास्त फायदा करून घ्यावा. विद्यार्थ्यांनीही उर्दू भाषा शिकून घ्यावी. तसेच या ठिकाणी उर्दू भाषेतील विविध कार्यक्रमाचे आयोजन करावे. पुढील काळात हे उर्दू घर जिल्ह्यात उर्दू भाषेच्या संवर्धन व प्रसारात अत्यंत महत्त्वाची भूमिका पार पाडेल, असे प्रतिपादन अपर जिल्हाधिकारी मोनिका सिंह ठाकूर यांनी केले.
अल्पसंख्यांक विकास विभाग व जिल्हाधिकारी कार्यालय यांच्या संयुक्त विद्यमाने सिव्हिल चौक येथे सोलापूर उर्दू घरची उभारणी करण्यात आलेली होती. या उर्दू घरचे उद्घाटन व लोकार्पण अपर जिल्हाधिकारी मोनिका सिंह यांच्या हस्ते गुरूवारी, ०७ मार्च रोजी झाले, त्याप्रसंगी त्या बोलत होत्या.
यावेळी उपविभागीय अधिकारी सदाशिव पडदुणे, जिल्हा पुरवठा अधिकारी सीमा होळकर, तहसीलदार उज्वला सोरटे, सार्वजनिक बांधकाम विभागाचे उपअभियंता ठाकरे, आसिफ इकबाल, डॉ. मोहम्मद शफी चोबदार, उर्दू कवी बशीर परवाज, उर्दू घरचे ग्रंथपाल साहीर नदाफ आदी उपस्थित होते.
अप्पर जिल्हाधिकारी मोनिका सिंह पुढे म्हणाल्या की, सोलापूर शहरात मोठ्या प्रमाणावर उर्दू शाळा, उर्दू महाविद्यालय तसेच उर्दू भाषिकांची संख्या आहे. सोलापूरकर नागरिक हे उर्दू भाषेवर भरभरून प्रेम करतात. त्यामुळे शासनाने सोलापूर शहरात उर्दू घराची उभारणी केलेली असून येथील ग्रंथालयाचा जास्तीत-जास्त नागरिक व विद्यार्थ्यांनी लाभ घ्यावा, येथे येऊन उर्दू भाषेचे ग्रंथ, पुस्तके व साहित्य चे वाचन करावे. उर्दू भाषेचे समृद्ध ज्ञान घेऊन येथील विद्यार्थी उर्दू भाषेत राष्ट्रीय पातळीवर पोहोचावेत, अशी अपेक्षा त्यांनी यावेळी व्यक्त केली.
उर्दू घराचा वापर उर्दू भाषेचे अभ्यासक्रम व कार्यक्रम यासाठीच व्हावा, अशी अपेक्षा उपविभागीय अधिकारी सदाशिव पडदुणे यांनी व्यक्त केली. उर्दू घरचे सदस्य डॉ. मोहम्मद यांनी उर्दू भाषा ही सर्वांना एकत्र जोडणारी भाषा असल्याचे नमूद केले.
कार्यक्रमाची सुरुवात एम.ए. पानगल उर्दू हायस्कूलच्या विद्यार्थ्यांच्या स्वागत गीताने झाली. तर उर्दू घरचे सदस्य असिफ इकबाल यांनी सोलापूरचा उर्दू इतिहास सांगितला. यावेळी उर्दू कवी बशीर परवाज यांचा विशेष सत्कार करण्यात आला.
प्रारंभी अप्पर जिल्हाधिकारी मोनिका सिंह यांच्या हस्ते फीत कापून उर्दू घराचे उद्घाटन व लोकार्पण करण्यात आले. या कार्यक्रमास मोठ्या प्रमाणावर उर्दू भाषिक नागरिक उपस्थित होते. कार्यक्रमाचे सूत्रसंचालन मेहमूद नवाज यांनी केले तर आभार राजा बागवान यांनी मानले.
