.jpeg)
सोलापूर शहर हद्दीत जमावबंदी व शस्त्रबंदीचे आदेश लागू
सोलापूर : सोलापूर शहर हे महाराष्ट्रातील सर्वात मोठ्या प्रमाणावर धार्मिक सण, उत्सव, जयंती, पुण्यतिथी साजरे करणारे शहर आहे. सोलापूर शहरात छोटया मोठ्या कारणावरुन संप, आंदोलने, निदर्शने होत असतात. शहरात आगामी काळात महापरिनिर्वाण दिन, संत रोहिदास पुण्यतिथी, इतर विविध इत्यादी सण, उत्सव संपन्न होणार आहेत. शहरातील कायदा व सुव्यवस्था अबाधित रहावी यासाठी दिनांक ०५ ते १९ डिसेंबर २०२३ या कालावधीत महाराष्ट्र पोलीस अधिनियम १९५१ चे कलम ३७ (१) व (३)अन्वये पोलीस उप-आयुक्त डॉ. दीपाली काळे यांनी प्रतिबंधात्मक आदेश जारी केले आहेत.
दि.६ डिसेंबर रोजी बाबरी मशिद पतन दिन निमित्त मुस्लीम समाजाचे वतीने काळा दिवस, तर हिंदू समाजाचे वतीने विजयी दिवस साजरा केला जाणार आहे. सद्य:स्थितीत धार्मिक स्थळावरील लावण्यात आलेले भोंगे, मराठा आरक्षण, ओ.बी.सी. आरक्षण, धनगर आरक्षण, हिवाळी अधिवेशन, आगामी निवडणुकीच्या पार्श्वभुमीवर सभा, मोर्चे, निदर्शने, विरोध दर्शक आंदोलने आदी माध्यमातून कायदा व सुव्यवस्थेस बाधा होण्याची दाट शक्यता असल्याने महाराष्ट्र पोलीस अधिनियम १९५१ चे कलम ३७ (१) व (३) अन्वये प्रतिबंधात्मक आदेश जारी करणे आवश्यक आहे.
या कालावधीत शस्त्रे, तलवारी, भाले, सुरे, बंदुका, काठया किंवा झेंडा असलेली काठी किंवा इजा करण्यासाठी वापरात येईल अशी कोणतीही वस्तु ,कोणताही ज्वालागृही अगर स्फोटक पदार्थ वाहून नेण्यास मनाई आहे. दगड अगर तत्सम शस्त्रे साठविणे अगर बाळगणे, व्यक्ती अगर प्रेत अगर त्यांचे प्रतिमा याचे प्रदर्शन करणे. सार्वजनिक घोषणा देणे, गाणी म्हणणे, वाद्य वाजविणे, असभ्य हावभाव करणे, असभ्य भाषा वापरणे, सभ्यता अगर नितीविरुध्द निरनिराळ्या जमातीच्या भावना दुखावल्या जातील व त्यामुळे त्यांच्यात भांडणे, बखेडे निर्माण होतील अशी सोंगे अगर चिन्ह अगर दस्तऐवज अगर जिन्नस तयार करुन त्याचा प्रचारासाठी उपयोग करण्यास मनाई आहे.
सरकारी नोकरांना त्यांचे कर्तव्य व अधिकार बजावण्यासाठी उपनिर्दीष्ट वस्तु हाताळाव्या लागतात आणि ज्यांनी सक्षम पोलीस प्राधिकरणाची परवानगी घेतली आहे. अशा व्यक्तींना परवानगीतील अटीस पात्र राहुन सदरचे आदेश लागू पडणार नाहीत. तसेच हा आदेश लग्न, अंत्ययात्रा इ. लागू असणार नाही. तसेच मिरवणूका, मोर्चा, रॅली, आंदोलने, निवेदने, धरणे, सभा आदी सक्षम पोलीस प्राधिकरणाची पूर्वपरवानगी घेऊन केला असेल, त्यांना लागू होणार नाही.असेही आदेशात नमूद करण्यात आले आहे.
