रांझणी भिमानगर ग्रामपंचायत सरपंच सौ. चंचला विजय पाटील यांचा राजीनामा
टेंभुर्णी/प्रदीप पाटील :
मनोज जरांगे पाटील यांच्या आंदोलनाला पाठिंबा देण्यासाठी माढा तालुक्यातील रांझणी भिमानगर ग्रामपंचायत सरपंच सौ. चंचला विजय पाटील यांनी आपल्या पदाचा राजीनामा दिला. रांझणी भिमानगर येथे साखळी उपोषणाला सुरूवात झाली असून शिवकन्या कु.प्राची सुरेश जाधव व मेजर संजय गोटणे यांच्या हस्ते छत्रपती शिवाजी महाराज यांच्या प्रतिमेचे पूजन करण्यात आले व बेमुदत साखळी उपोषणाला सुरुवात करण्यात आली.
यावेळी मा कृषी सभापती संजय पाटील भिमानगरकर यांच्या नेतृत्वाखाली उपस्थित राहून सरपंच प्रतिनिधी पै गणेश पाटील यांनी ही घोषणा केली.
मराठा समाजाला आरक्षण मिळावे, यासाठी महाराष्ट्रातील पहिल्या महिला सरपंच पदाचा राजीनामा सौ. चंचला पाटील यांनी दिला असल्याने आरक्षणाची धग आता अधिकच तीव्र झाली आहे.
मनोज जरांगे पाटील यांनी मराठा आरक्षणाच्या अनुषंगाने सुरू केलेल्या आंदोलनास पाठिंबा दर्शविण्यासाठी व या आंदोलनाच्या दृष्टिकोनातून रांझणी भिमानगरच्या सरपंच सौ. चंचला पाटील यांनी ठोस भूमिका घेऊन समाज बांधवांच्या पाठीशी ठामपणे उभे राहण्यासाठी रांझणी भिमानगरच्या सरपंच पदाचा राजीनामा दिला.
सौ. पाटील यांनी राजीनामा दिल्याने हे आंदोलन अधिकच तीव्र झाल्याचे दिसून येते. सरपंच सौ. पाटील या आपल्या पदाचा राजीनामा देणाऱ्या महाराष्ट्रातील पहिल्या महिला सरपंच ठरल्या असून संपूर्ण सोलापूर जिल्ह्यातीतून महिला असून एवढी मोठी ठाम भूमिका घेतल्याबद्दल सौ. पाटील यांचं सर्व स्तरातून अभिनंदन केलं जात आहे.
यावेळी मा कृषी सभापती संजय पाटील भिमानगरकर, विठ्ठलराव शिंदे स. सा. का. संचालक वेताळ जाधव, सरपंच प्रतिनिधी पै.गणेश पाटील, मा. सरपंच पांडुरंग माने, नितीन मस्के, सतीश चौगुले, औदुंबर जाधव, राजेंद्र जाधव, राहुल चौगुले यांच्यासह ग्रामस्थ मोठ्या संख्येने उपस्थित होते.
