सोलापूर : शेजाऱ्याकडून किराणा दुकानात लाईट कनेक्शन घेतले म्हणून ७० हजार रूपयांचा दंड आकारलेला आहे, असे सांगून तो दंड माफ करण्याकरिता सहाय्यक लेखापाल श्रीकांत भीमराव आवाड यांनी तक्रारदार यांच्याकडे सुरुवातीस १५ हजार रुपयांची मागणी करून तडजोडीअंती ५ हजार रुपये लाच स्विकारल्याप्रकरणी लाचलुचपत प्रतिबंधक विभाग, पुणे कार्यालयाच्या पथकाने श्रीकांत आवाड यांना शनिवारी रंगेहात पकडले.
याबाबत मिळालेली अधिक माहिती अशी की, श्रीकांत आवाड पंढरपूर ग्रामीण-२,महावितरण कार्यालयात सहाय्यक लेखापाल वर्ग-३ पदावर कार्यरत आहेत. त्यांनी एका किराणा दुकानदाराकडे शेजाऱ्याकडून अनधिकृतपणे विद्युत पुरवठा घेऊन नियमभंग केला व नवीन मीटर घेण्यासाठी ७० हजार रुपये दंड आकारल्याचे सांगितले होते. तो दंड माफ करण्यासाठी श्रीकांत आवाड (वय -३८ वर्षे रा. फ्लॅट नंबर १०१, एस -2,किसान संकुल,जुना विडी घरकुल,सोलापूर) यांनी त्याच्याकडे १५ हजार रुपयाची लाच मागितली, अशी तक्रार पुणे कार्यालयाकडे आली होती. त्या तक्रारीची शहानिशा करून एसीबी पथकाने सापळा लावला होता.
तडजोडीअंती ठरलेली ०५ हजार रुपयांची लाच स्वीकारत असताना लोकसेवक आवाड यांना महावितरण कार्यालय, पंढरपूर कार्यालयाच्या आवारात लाच लुचपत प्रतिबंधक विभागाच्या अधिकाऱ्यांनी रंगेहात पकडले. याबाबत पंढरपूर शहर पोलीस स्टेशन येथे गुन्हा दाखल करण्याची कार्यवाही सुरू आहे.
ही कारवाई मार्गदर्शन अधिकारी अपर पोलीस अधीक्षक डॉ. शीतल जानवे,पोलीस उप अधीक्षक नितिन जाधव (लाचलुचपत प्रतिबंधक विभाग, पुणे) यांच्या मार्गदर्शनाखाली पोलीस निरीक्षक श्रीराम शिंदे, पो.शि. रियाज शेख, पो.शि. दिनेश माने, पो. शि. मंगेश कांबळे, चालक पो.हवा दिवेकर (लाचलुचपत प्रतिबंधक विभाग, पुणे) यांनी पार पाडली.
आवाहन
सर्व नागरिकांना आवाहन करण्यात येते की, आपणास कोणी शासकीय अधिकारी/कर्मचारी कोणतेही शासकीय काम करण्यास फी व्यतिरिक्त लाचेची मागणी करीत असल्यास तात्काळ आमच्याशी लाचलुचपत प्रतिबंधक विभाग, पुणे. मोबाईल क्र. 9923046855, कार्यालय क्र. 020 26132802, ई-मेल:dyspacbpune@gmail.com टोल फ्री क्र.1064 या ठिकाणी संपर्क साधावा, असे आवाहनही त्यांनी केले आहे.
