सोलापूर : राज्य उत्पादन शुल्क विभाग, सोलापूर यांनी जिल्ह्यात अवैध हातभट्टी निर्मिती, मद्य विक्री व वाहतुकीविरोधात विशेष मोहीम राबवत मोठी कारवाई केली आहे. या कारवाईत 23, 56, 840 रुपयांचा मुद्देमाल जप्त करण्यात आला असून 64 गुन्हे दाखल करण्यात आले आहेत.
विभागीय उपायुक्त पुणे विभाग सागर धोमकर यांच्या निर्देशानुसार तसेच अधीक्षक राज्य उत्पादन शुल्क सोलापूर भाग्यश्री पं. जाधव, आणि उपअधीक्षक सौरभ बा. अदाटे यांच्या मार्गदर्शनाखाली, 29 मे ते 31 मे या कालावधीत सोलापूर शहर व जिल्ह्यात धडक कारवाई करण्यात आली.
या कारवाईत 43, 175 लिटर रसायन, 3, 783 लिटर हातभट्टी दारू, 16.2 बल्क लिटर देशी मद्य, 15.6 बल्क लिटर बिअर आणि 125 बल्क लिटर ताडी असा मोठा साठा जप्त करण्यात आला. तसेच 47 जणांवर कारवाई करून 3 वाहनांसह एकूण 23.56 लाख रुपयांचा मुद्देमाल जप्त करण्यात आला.
राज्य उत्पादन शुल्क विभागाने हातभट्टी निर्मितीचे समूळ उच्चाटन करण्यावर भर दिला असून पोलीस विभाग व इतर यंत्रणांच्या समन्वयाने संयुक्त कठोर कारवाया करण्यात येणार असल्याचे सांगण्यात आले आहे. अवैध मद्य विक्री, निर्मिती किंवा वाहतुकीसाठी जागा उपलब्ध करून देणाऱ्या मालकांनाही आरोपी करण्यात येत असल्याची माहिती विभागाने दिली.
दरम्यान, मिथेनॉलयुक्त बनावट दारूमुळे पुण्यात घडलेल्या दुर्घटनेचा संदर्भ देत नागरिकांना सतर्क राहण्याचे आवाहन करण्यात आले आहे. अशा विषारी दारूमुळे किडनी निकामी होणे, कायमस्वरूपीचा अंधत्व येणे व अकाली मृत्यू यांसारखे गंभीर परिणाम संभवतात, असे विभागाने स्पष्ट केले.
गुन्हे अन्वेषणाच्या आकडेवारीनुसार, जानेवारी ते मे 2025 या कालावधीत जिल्ह्यात 1,197 गुन्हे, 1,101 वारस, 1,124 अटक आरोपी आणि 3, 33, 27, 147 रुपयांचा मुद्देमाल जप्त करण्यात आला होता. तर जानेवारी ते मे 2026 या कालावधीत 1,297 गुन्हे, 1,221 वारस, 1,254 अटक आरोपी आणि 5, 73, 30, 206 रुपयांचा मुद्देमाल जप्त करण्यात आला आहे. यामध्ये गुन्ह्यांमध्ये 8 टक्के, वारसांमध्ये 11 टक्के, अटक आरोपींमध्ये 12 टक्के आणि मुद्देमालाच्या किमतीत 72 टक्के वाढ झाल्याचे दिसून आले आहे.
अवैध मद्यनिर्मिती, विक्री, वाहतूक किंवा मिथेनॉल, क्लोरेल हायड्रेट यांसारख्या पदार्थांच्या वापराबाबत माहिती असल्यास नागरिकांनी टोल फ्री क्रमांक 1800233999 किंवा व्हॉट्स ॲप क्रमांक 8422001133 वर तात्काळ माहिती द्यावी. माहिती देणाऱ्याचे नाव गोपनीय ठेवण्यात येईल, असे राज्य उत्पादन शुल्क अधीक्षक श्रीमती भाग्यश्री जाधव यांनी सांगितले व अवैध मद्याबाबतची माहिती कळविण्याचे आवाहन केलं आहे.
*****
