प्रत्येक चौकात मंदिराकडे जाण्याचा मार्गदर्शक फलक हवा
केंद्रीय रस्ते वाहतूक व महामार्ग मंत्री नितीन गडकरी यांनाही केला ईमेल
सोलापूर : ग्रामदैवत श्री शिवयोगी सिद्धरामेश्वर यांचे मंदिर शहरात असल्याचे परगावहून येणाऱ्या भाविकांना माहिती व्हावी, यासाठी शहरात प्रवेश करणाऱ्या मार्गावर स्वागत कमानी उभारण्यात याव्यात, अशी मागणी वीरशैव व्हिजन च्या वतीने महापौर विनायक कोंड्याल यांच्याकडे आणि इ-मेल केंद्रीय रस्ते वाहतूक व महामार्ग मंत्री नितीन गडकरी यांनाही करण्यात आला.
भाविक शहरात आले, तर शहराचे पर्यटन वाढणार आहे. आलेले भाविक शहरातील आजूबाजूचे ठिकाणांना भेटी देतील. यामुळे पर्यटनाच्या दृष्टीने सोलापूरच्या विकासास हातभार लागणार आहे. शहरात अनेक भाविक येतात. ते जिल्हा स्थळानजिकच्या पंढरपूर, तुळजापूर, अक्कलकोट व गाणगापूर या तिर्थक्षेत्राला आवर्जून भेटी देतात, मात्र श्री सिध्देश्वर मंदिराकडे येत नाहीत.
कारण त्यांना श्री सिध्देश्वर मंदिराची माहिती नसते. त्यासाठी शहरात प्रवेश करणाऱ्या सर्व मार्गावर स्वागत कमानी उभारून त्यावर 'श्री शिवयोगी सिध्देश्वर पावन नगरीत हार्दिक स्वागत' असे नमूद करावे. हिच मागणी केंद्रीय रस्ते वाहतूक व महामार्ग मंत्री नितीन गडकरी यांच्याकडे मेलद्वारे तर येथील राष्ट्रीय महामार्ग प्राधिकरण कार्यालयासही देण्यात आले.
नूतन महापौर विनायक कोंड्याल यांचा प्रारंभी वीरशैव व्हिजन उत्सव समितीचे अध्यक्ष विजयकुमार बिराजदार यांच्या हस्ते शाल फेटा व पुष्पगुच्छ देऊन सत्कार करण्यात आला. त्यानंतर महापौर कोंड्याल यांनी महानगरपालिकेच्या आगामी सभेत हा विषय मांडला जाईल, त्यावर सर्वानुमते निर्णय घेतला जाईल, असे आश्वस्त केले.
यावेळी वीरशैव व्हिजनचे संस्थापक अध्यक्ष राजशेखर बुरकुले, युवक आघाडी अध्यक्ष सोमनाथ चौधरी, सोशल मीडिया प्रमुख अमित कलशेट्टी, कार्यकारणी सदस्य योगेश कापसे, नागराज कोंडे, कार्याध्यक्ष शिवानंद सावळगी, बसवराज चाकाई, कार्तिक स्वामी, लोकेश इरकशेट्टी आणि अजिंक्य कटाप उपस्थित होते.
फोटो ओळी : वीरशैव व्हिजनतर्फे सिद्धरामाच्या नगरीत स्वागत कमानी उभारण्याचे निवेदन महापौर विनायक कोंड्याल यांना देताना विजयकुमार बिराजदार राजशेखर बुरकुले, सोमनाथ चौधरी, अमित कलशेट्टी, योगेश कापसे, नागराज कोंडे छायाचित्र दिसत आहेत.
