सोलापूर : पत्नीची छेडछाड केल्यामुळे चिडून जाऊन अमर ज्ञानू खिलारे याचा चाकूने मारुन खून केल्याच्या आरोपात लक्ष्मण जगन्नाथ तांबे व देवप्पा पांडुरंग तांबे (दोघे रा. धायटी, ता. सांगोला) या आरोपीविरुध्द असलेला परिस्थितीजन्य पुरावा विश्वासार्ह व पुरेसा नसल्याने पंढरपूर सत्र न्यायालयाने उभयतांची निर्दोष मुक्तता केली.
सांगोला तालुक्यातील शिरभावी येथील अमर खिलारे हा पेंटींगचे काम करत होता. आरोपीच्या घराचे पेंटींग करण्याचे काम त्याने घेतले होते. त्याचा मृतदेह धायटी शिवारातील तांबे मळ्यात मिळून आला होता .त्या संदर्भात मृताचा भाऊ चंद्रकांत खिलारे याने सांगोला पोलीस स्टेशनला फिर्याद दाखल केली होती.
तपासादरम्यान असे निष्पन्न झाले की, पेंटिंग काम करण्यास गेला असताना मयत अमर याने आरोपीच्या पत्नीची छेडछाड केली, म्हणून चिडून जाऊन दोन्ही आरोपींनी अमर याचा चाकूने मारुन खून केला. तपास पूर्ण झाल्यानंतर सांगोला पोलिसांनी न्यायालयात दोषारोपपत्रक दाखल केले होते. आरोपीविरुध्द असलेला परिस्थितीजन्य पुरावा विश्वासार्ह व पुरेसा नसल्याने न्यायालयाने दोन्ही आरोपींची निर्दोष मुक्तता केली.
या खटल्यात आरोपीतर्फे ॲड. धनंजय माने, ॲड. जयदीप माने, ॲड. सिध्देश्वर खंडागळे, ॲड. सुहास कदम, ॲड. वैभव सुतार यांनी काम पाहिले.
