सोलापूर : मोहोळ तालुक्यातील सावळेश्वर येथे पत्नी स्वाती हिच्या चारित्र्य संशयावरून लोखंडी रॉडने मारून तिची हत्या केल्याच्या आरोपात जन्मठेपेची शिक्षा भोगत असलेल्या बाळू दादा जाधव याला मुंबई उच्च न्यायालयाच्या कोल्हापूर बेंचने जामिनावर मुक्त करण्याचे आदेश दिले.
पत्नीच्या खून प्रकरणी मोहोळ पोलिसांनी आरोपी बाळू दादा जाधव याच्याविरुद्ध दोषारोप पत्र दाखल केले होते. या खटल्याची सुनावणी सोलापूर सत्र न्यायालय झाली होती. आरोपीचा मुलगा प्रकाश याने वडिलाविरुद्ध न्यायालयात साक्ष दिली होती.
सोलापूर सत्र न्यायालयाने प्रकाश याच्या साक्षीवर विश्वास ठेवून आरोपी बाळू जाधव यास जन्मठेपेची शिक्षा सुनावली होती. या शिक्षेविरुद्ध आरोपी बाळू जाधव याने ॲड. जयदीप माने यांच्यामार्फत मुंबई उच्च न्यायालयात अपील दाखल केले होते. या अपीलात जामीन अर्ज दाखल केलेला होता.
या जामीन अर्जाची सुनावणी मुंबई उच्च न्यायालय कोल्हापूर सर्किट बेंच चे न्यायमूर्ती एम. एस. कर्णिक व न्यायमूर्ती शर्मिला देशमुख यांच्या खंडपीठांसमोर झाली. खंडपीठाने आरोपीचा जामीन अर्ज मंजूर केला आणि आरोपीची जामिनावर मुक्तता करण्याचे आदेश दिले.
या प्रकरणी उच्च न्यायालयात आरोपीतर्फे ॲड. जयदीप माने यांनी तर सरकारतर्फे ॲड. ए. ए. नाईक यांनी काम पाहिले.
