सोलापूर : देशभरात गेल्या वर्षभरात 01 सप्टेंबर, 2024 ते 31 ऑगस्ट, 2025 या कालावधीत 191 पोलीस अधिकारी व अंमलदार हे कर्तव्य बजावीत असताना शहिद झालेले आहेत. त्यांचे स्मरण करण्याकरिता व त्यांना आदरांजली अर्पण करण्याकरिता मंगळवारी, 21 ऑक्टोबर रोजी सकाळी 08.00 वाजता पोलीस मुख्यालय येथे पोलीस शहिद स्मृतिदिन कार्यक्रमाचं आयोजन करण्यात आलं आहे
21 ऑक्टोबर 1959 रोजी केंद्रीय राखीव पोलीस दलाचे पोलीस उप निरीक्षक किरणसिंग यांच्या नेतृत्वात अक्साई चिनच्या दुर्गम भागात 16, 000 फुटावर असलेल्या हॉट स्प्रिंग्ज या ठिकाणी गस्त घालत असलेल्या आपल्या 10 जवानांवर चिनी सैनिकांनी अचानक हल्ला चढविला. 
या हल्ल्यात आपल्या 10 जवानांना वीर मरण आले. आपले कर्तव्य बजावत असताना या जवानांनी अतिशय शौर्याने शत्रुविरुध्द लढा दिला. या जवानांच्या हौतात्म्यांचे स्मरण म्हणुन आजही दरवर्षी 21 ऑक्टोबरला देशभरातून प्रत्येक प्रातांचे प्रतिनिधीत्व करणारे पोलीस अधिकारी व अंमलदार यांचेकडून त्यांना आदरांजली वाहिली जाते. 
त्याचबरोबर देशाची अखंडता आणि एकात्मतेचे रक्षण करण्यासाठी, कधी नक्षल्याविरोधात तर कधी समाज विघातक कृती करणाऱ्या विरोधात कारवाई करताना तर कधी कायदा व सुव्यवस्थेचे पालन निट व्हावे, म्हणून सतत जागरुकपणे आपली सेवा बजावताना, कर्तव्यात जराही कसुर न करता वीरमरण प्राप्त झालेल्या पोलीस जवानांची आठवण मनात कायम तेवत ठेवून श्रध्दांजली वाहण्यासाठी देशभरात पोलीस हुतात्मा दिवस म्हणून देखील साजरा केला जातो.
सोलापूर वासियांनी पोलीस शहिद स्मृतिदिन कार्यक्रमास उपस्थित रहावं, असं आवाहन पोलीस आयुक्त एम राज कुमार यांनी केलं आहे.
