साहित्य रत्न लोकशाहीर अण्णाभाऊ साठे जयंतीनिमित्त पार पडली शांतता कमिटीची बैठक
सोलापूर : लोकशाहीर अण्णाभाऊ साठे जयंती २०२५ चे अनुषंगाने सोलापूर शहरातील कायदा व सुव्यवस्था अबाधित राखण्यासाठी शुक्रवारी, २५ जुलै रोजी सायंकाळी पोलीस आयुक्तालयातील पोलीस अधिकारी, शांतता समिती सदस्य, सोलापूर महानगरपालिकेकडील अधिकारी, धर्मादाय आयुक्त कार्यालयाकडील अधिकारी, लोकशाहीर अण्णाभाऊ साठे जयंती उत्सवाचे पदाधिकारी आणि सदस्यांची पोलीस आयुक्त कार्यालयात संयुक्तपणे बैठक पार पाडली. या बैठकीत ०३ ऑगस्ट रोजी जयंती सांगता मिरवणुका निघणार आहेत. मिरवणुकीमध्ये आधुनिक वाद्यांऐवजी पारंपारीक वाद्य वाजविण्याच्या सूचना पोलीस आयुक्त एम राज कुमार यांनी दिल्या. 
या बैठकीच्या प्रारंभी पोलीस उप आयुक्त (गुन्हे) श्रीमती डॉ. अश्विनी पाटील यांनी प्रास्ताविक करुन बैठक आयोजन करण्यामागचा उद्देश स्पष्ट केला. बैठकीच्या अध्यक्षस्थानी पोलीस आयुक्त एम राजकुमार होते.
सोलापुरात येत्या ०१ ते ०३ ऑगस्ट दरम्यानच्या कालावधीत लोकशाहीर अण्णाभाऊ साठे जयंती साजरी करण्यात येणार आहे. उत्सवाचे पदाधिकारी आणि सदस्यांच्या सूचनांचं स्वागत करून पोलीस आयुक्त एम राजकुमार यांनी समस्यांचं निराकरण करण्याच्या सूचना संबंधित विभागाला केल्या.
सोशल मिडीयावरुन काही आक्षेपार्ह मेसेजेस, फोटो, पोस्ट व्हायरल होत असल्याचे निदर्शनास आल्यास त्याबाबत त्वरीत पोलीस यंत्रणेस कळवावे. लोकशाहीर अण्णाभाऊ साठे जयंती उत्सव-२०२५ मंडळानी ऑनलाईन, ऑफलाईन पध्दतीने परवानगी घेणे बंधनकारक आहे, याची नोंद घ्यावी. ऑनलाईन व ऑफलाईन नोंदणीकरीता प्रत्येक पोलीस ठाणे येथे स्वतंत्र व्यवस्था करण्यात आली आहे. पोलिसांनी दिलेल्या सूचनांचं पालन करावं, असं आवाहनही पोलीस आयुक्तांनी यावेळी उपस्थितांना केले.
त्यानंतर बैठकीस उपस्थित शांतता समिती सदस्य व इतरांनी समस्या/सुचना मांडल्या. त्या समस्यांचं/सुचनेचे संबंधित महानगरपालिका, महावितरण, आर. टी. ओ., धर्मादाय आयुक्त कार्यालय अशा खात्याच्या अधिकाऱ्यांनी कामाची रुपरेषा बघून समस्या सोडविण्यात येतील, असे सांगितले.
पोलीस आयुक्तांनी बैठकीस उपस्थित लोकांचे स्वागत करुन मांडलेल्या अडी-अडचणींचं निरसण केले. उत्सव साजरा करताना बऱ्याचवेळी कायदेशीर बाबींचे उल्लंघन होत असते, कोणीही कायदा हातात घेऊ नये, कोणताही अनुचित प्रकार निदर्शनास आल्यास पोलीसांशी संपर्क साधावा, शांतता समिती सदस्य व नागरीकांनी आपल्या परीसरातील बेकायेदशीर बाबींची माहिती पोलीसांना दिली पाहिजे, असं आवाहन पोलीस आयुक्तांनी केले.
... चौकट ...
नियमांचे पालन नाही झाले तर होईल कायदेशीर कारवाई : एम. राज कुमार
मिरवणुकीमध्ये अफवा पसरवू नयेत, शासनाने नेमून दिलेल्या सुचना पाळल्या पाहिजेत. योग्य तो बंदोबस्त नेमू,नियमांचे पालन करावं, नियमांचे पालन नाही झाले तर कायदेशीर कारवाई होईल, असा इशारा देऊन एम. राज कुमार यांनी लोकशाहीर अण्णाभाऊ साठे जयंतीनिमित्त उपस्थितांना शुभेच्छा दिल्या.
... चौकट ...
सामाजिक संदेश असलेल्या जाहिराती प्रदर्शित करण्यास द्यावी पसंदी
उत्सव काळात सर्व मंडळानी सीसीटीव्ही कॅमेरेंची व्यवस्था करावी, मंडपासाठी सार्वजनिक रस्त्याचा २/३ भाग मोकळा सोडावा मोकाट जनावरांपासून मुर्ती/फोटोस धोका होणार नाही, याची खबरदारी घ्यावी. देखावे चित्र आक्षेपार्ह नसावेत, उत्सवाचे पावित्र्य राखावे, मंडळांकडुन जाहिरात प्रदर्शन करण्यात येत असल्यास आरोग्य विषयक व सामाजिक संदेश असलेल्या जाहिराती प्रदर्शित करण्यास पसंदी द्यावी. तसेच स्वच्छता, जलसंवर्धन, वृक्षारोपण, साक्षरता, सायबर गुन्हेगारी यंत्रणाबाबत जनजागृती करावी. सर्वोच्च न्यायालयाचे ध्वनीप्रदुषण अनुषंगाने दिलेल्या मार्गदर्शक सुचनांचे पालन करावे.
मंडळांनी महावितरण विभागाकडून अधिकृत विद्युत जोडणी करुन घ्यावी जेणेकरुन मंडपामध्ये शॉर्टसर्कीट होवून इजा अथवा धोका होणार नाही, याची दक्षता घ्यावी. सर्व मंडळांनी मिरवणुकीत सामिल होणाऱ्या वाहनांची आर टी ओ कडुन तपासणी करावी. मिरवणुकीमध्ये मोठे व लांब कंटेनर वापरु नये, वाहनांवरील देखाव्यांची उंची अडथळा होणारी नसावी.
मिरवणुक संवेदनशिल ठिकाणी जास्त वेळ रेंगाळत ठेऊ नये. इतर धर्मांच्या भावना दुखावणार नाहीत, यांची काटेकोर दक्षता घ्यावी मंडळाने स्थापन केलेल्या लोकशाहीर अण्णाभाऊ साठे जयंती यांचे मुर्तीसमोर स्वयंसेवक सतत हजर राहतील व मुर्तीची देखभाल करतील, याची पुरेपुर काळजी घ्यावी.
