सोलापूर : येथील जात पडताळणी प्रमाणपत्र कार्यालयात पूर्णवेळ अध्यक्ष नसल्याने जात पडताळणी प्रमाणपत्र मिळण्यासाठी होणाऱ्या विलंबामुळे विद्यार्थ्यांचे शैक्षणिक व आर्थिक नुकसान होत आहे. प्रारंभापासूनच पडताळणी कामासाठी पूर्णवेळ अध्यक्ष द्यावा, अशी संभाजी ब्रिगेडची आग्रही मागणी असून अध्यक्षानी तातडीने पूर्णवेळ पदभार घ्यावा अथवा शासनाच्या वतीने पुन्हा एकदा मुदतवाढ द्यावी, अशी मागणी सामाजिक व न्याय मंत्री संजय शिरसाट यांना संभाजी ब्रिगेडच्या वतीने निवेदन व ई-मेल द्वारे करण्यात आलीय.
सोलापूरसह अनेक जिल्हा जात पडताळणी समिती कार्यालयकडे हजारो अर्ज प्रलंबित होते. त्यामुळे शासनाच्या वतीने गेल्या महिन्यांमध्ये सर्व जिल्ह्यांसाठी जात पडताळणी प्रमाणपत्र कार्यालयासाठी अध्यक्ष नेमण्यात आले होते, तथापि सोलापूर जिल्ह्यासाठी पूर्णवेळ अध्यक्ष महिना होत आला तरी रुजू झाले नाहीत.
अनेक जात पडताळणी प्रमाणपत्र देण्याचे काम अद्यापही प्रलंबित आहेत. त्यामुळे अनेक विद्यार्थ्यांचे शैक्षणिक व आर्थिक नुकसान होत आहे. त्यामुळे सोलापूर जिल्ह्यासाठी जात पडताळणी अध्यक्ष तात्काळ मिळण्यासंबंधी कार्यवाही होणे अगत्याचं आहे.
विद्यार्थ्यांचे नुकसान टाळण्यासाठी जात प्रमाणपत्र पडताळणी प्रमाणपत्र ची मुदत वाढवून मिळावी, अन्यथा विद्यार्थ्यांचे शैक्षणिक व आर्थिक नुकसान झाल्यास संभाजी ब्रिगेडच्या वतीने तीव्र आंदोलन करण्यात येईल, असा इशारा संभाजी ब्रिगेडच्या वतीने देण्यात आला.
यावेळी संभाजी ब्रिगेड पश्चिम महाराष्ट्र अध्यक्ष श्याम कदम, जगदाळे, जिल्हाध्यक्ष महिला आघाडी मीनल दास, शहराध्यक्ष मोनाली धुमाळ, सुनिता घंटे, राजनंदिनी धुमाळ, जयश्री पाटील, कार्याध्यक्ष अरविंद शेळके, रमेश भंडारे, रमेश चव्हाण, वैभव धुमाळ, दिलीप निंबाळकर, शेखर कंटेकर, सतीश वावरे, अभिषेक जागीरदार, सिद्धाराम सवळे आदी उपस्थित होते.
ताजा कलम - अंजली अमोल ताकमोगे हिने कुणबी दाखल्यावरून वंदना एन. तासगावकर आयुर्वेद महाविद्यालय, चंदाई, पो.नसरापूर, ता.कर्जत, जि.रायगड या आयुर्वेद महाविद्यालयातील बी.ए.एम.एस. साठी 2024 मध्ये प्रवेश घेतला आहे. स्कॉलरशिप मिळण्यासाठी महाडीबीटी पोर्टलवर अर्ज करण्याची अंतिम मुदत 30 मार्च आहे.
अंजलीच्या वडिलांचे निधन झाले असून भाऊ लहान आहे. तिची घरची परिस्थिती हलाखीची आहे. त्यामुळे या संदर्भात गांभीर्याने विचार व्हावा, अशी विनंतीही या निवेदनात करण्यात आलीय.
