छत्रपती शिवाजी महाराज जन्मोत्सवात व्हावी समाज जागृती : एम राजकुमार

shivrajya patra

सोलापूर : राजे छत्रपती शिवाजी महाराज यांचा जन्मोत्सव सर्वत्र १९ फेब्रुवारी रोजी साजरा होतोय. या निमित्ताने निघणाऱ्या मिरवणुकीमध्ये आरोग्य विषयक व सामाजिक संदेश असलेल्या जाहिराती प्रदर्शित करण्यास पसंदी द्यावी. स्वच्छता, जलसंवर्धन, वृक्षारोपण, साक्षरता, सायबर जनजागृती, पारंपारीक वाद्य वाजविणे, सर्वोच्च न्यायालयाच्या ध्वनीप्रदुषण अनुषंगाने दिलेल्या मार्गदर्शक सुचनांचे पालन करावं, अशा सूचना पोलीस आयुक्त एम राजकुमार यांनी दिल्या.

छत्रपती शिवाजी महाराज जयंतीच्या अनुषंगाने सोलापूर शहरातील कायदा-सुव्यवस्था अबाधित राखण्यासाठी मंगळवारी, ११ फेब्रुवारी रोजी सायंकाळी शांतता समिती सदस्य, सोलापूर महानगर पालिकेकडील अधिकारी, आर. टी. ओ. अधिकारी, महावितरण चे अधिकारी, छत्रपती शिवाजी महाराज जयंती सार्वजनिक मंडळाचे पदाधिकारी-सदस्य यांची पोलीस आयुक्त कार्यालयात संयुक्तपणे शांतता कमिटी बैठक आयोजित केली होती. पोलीस आयुक्त एम राजकुमार बैठकीच्या अध्यक्षस्थानी होते.

सोलापुरात शनिवारी, १५ ते १९ फेब्रुवारी दरम्यान छत्रपती शिवाजी महाराज जयंती साजरी करण्यात येतेय. या बैठकीची प्रस्तावना पोलीस उप आयुक्त (गुन्हे) श्रीमती डॉ. दिपाली काळे यांनी करुन बैठक आयोजन करण्यामागील उद्देश स्पष्ट केला. 

उत्सव काळात कोणताही अनुचित प्रकार टाळण्यासाठी सर्व मंडळांनी सीसीटीव्ही कॅमेऱ्यांची व्यवस्था करावी, मंडपासाठी सार्वजनिक रस्त्याचा २/३ भाग मोकळा सोडावा. मोकाट जनावरांपासून मुर्ती/फोटोस धोका होणार नाही, याची खबरदारी घ्यावी. देखावे चित्र आक्षेपार्ह नसावेत, उत्सवाचे पावित्र राखावे, देखावे, रोषणाई पाहण्यास येणाऱ्या महिला व पुरुष भाविकांकरीता स्वतंत्र रांगेची सोय करावी, प्रवेशाकरीता आणि बाहेर जाण्यास स्वतंत्र गेट असावे. मंडळांकडुन जाहिरात प्रदर्शन करण्यात येत असल्यास त्यामुळे गर्दी होणार नाही, याची दक्षता घ्यावी असा आवाहन पोलीस आयुक्त एम राजकुमार यांनी यावेळी केले.

मंडळांनी महावितरण विभागाकडून अधिकृत विद्युत जोडणी करुन घ्यावी, जेणेकरुन मंडपामध्ये शॉर्ट सर्कीट होवून इजा अथवा धोका होणार नाही, याची दक्षता घ्यावी. सर्व मंडळांनी मिरवणुकीत सामिल होणाऱ्या वाहनांची आर. टी. ओ. कडून तपासणी करावी, मिरवणुकीमध्ये मोठे व लांब कंटेनर वापरु नये, वाहनांवरील देखाव्यांची उंची अडथळा होणारी नसावी. मिरवणूक संवेदनशील ठिकाणी जास्त वेळ रेंगाळत ठेऊ नये. इतर धर्माच्या भावना दुखावणार नाहीत व तसेच मंडळाने स्थापन केलेल्या छत्रपती शिवाजी महाराज यांचे मुर्तीसमोर स्वयंसेवक सतत हजर राहतील ते मुर्तीची देखभाल करतील, याची पुरेपुर काळजी घ्यावी, असं पोलीस आयुक्तांनी यावेळी सांगितले.

सोशल मिडीयावरुन काही आक्षेपार्ह मेसेजेस, फोटो, पोस्ट व्हायरल होत असल्याचे निदर्शनास आल्यास त्याबाबत त्वरीत पोलीस यंत्रणेस कळवावे. छत्रपती शिवाजी महाराज जयंती उत्सव मंडळानी ऑनलाईन तसेच ऑफलाईन पध्दतीने परवानगी घेणे बंधनकारक आहे, याची नोंद घ्यावी. तसेच ऑनलाईन व ऑफलाईन नोंदणीकरीता प्रत्येक पोलीस ठाणे येथे स्वतंत्र व्यवस्था करण्यात आली आहे. तसेच पोलीसांनी दिलेल्या सुचनांचे पालन करावे, असंही एम राजकुमार यांनी यावेळी म्हटलं.

त्यानंतर बैठकीस उपस्थित शांतता समिती सदस्य व इतरांनी समस्या/सुचना मांडल्या. त्यानंतर या सूचनेचे संबंधित महानगर पालिका, महावितरण, आर टी ओ, धर्मादाय आयुक्त कार्यालय अशा खात्याचे अधिकारी यांनी सदर कामाची रुपरेषा बघून समस्या सोडविण्यात येतील, असे सांगितले.

पोलीस आयुक्त यांनी बैठकीस उपस्थित लोकांचे स्वागत करुन मांडलेल्या अडी-अडचणीचे निरसण केले. उत्सव साजरा करताना बऱ्याचवेळी कायदेशीर बाबींचे उल्लंघन होत असते, सर्वोच्च न्यायालयाचे ध्वनीप्रदूषण अनुषंगाने दिलेल्या मार्गदर्शक सुचनांचे पालन करावे. कोणीही कायदा हातात घेऊ नये, कोणताही अनुचित प्रकार निदर्शनास आल्यास पोलीसांशी संपर्क साधावा, शांतता समिती सदस्य व नागरीकांनी आपल्या परीसरातील बेकायेदशीर बाबींची माहिती पोलीसांना दिली पाहिजे. मिरवणुकीमध्ये अफवा पसरवू नये, नियमांचे पालन करावे, नियमांचे पालन नाही झाले तर कायदेशीर कारवाई होईल. शासनाने नेमून दिलेल्या सुचना पाळल्या पाहिजेत. तसेच सदर दिवशी कोणताही अनुचित प्रकार घडणार नाही, याची दक्षता पोलीस घेतील अशी ग्वाही दिली व बैठकीस आलेल्या सर्व उपस्थितांचं आभार मानले.

या बैठकीस, पोलीस आयुक्त एम राजकुमार,  पोलीस उप आयुक्त (मुख्यालय) अजित बोऱहाडे, पोलीस उप आयुक्त (गुन्हे) डॉ. दिपाली काळे, पोलीस उप आयुक्त विजय कबाडे, सहाय्यक पोलीस आयुक्त, प्रताप पोमण, (विभाग-१), यशवंत गवारी (विभाग-२), सुधिर खिरडकर (वाहतुक शाखा), राजन माने (गुन्हे शाखा), नियंत्रण कक्ष, तसेच सोलापूर महानगर पालिकेकडील अतिरीक्त आयुक्त कारंजे, आर. टी. ओ., महावितरण चे अधिकारी तसेच, सर्व पोलीस ठाणे/शाखा प्रभारी अधिकारी व पोलीस अंमलदार, शांतता कमिटीचे सदस्य आणि पत्रकार बंधू उपस्थित होते.

To Top