सोलापूर : शेगांवहून पंढरपूरकडे निघालेल्या संतश्रेष्ठ गजानन महाराज पालखीचे उत्तर सोलापूर तालुक्यातील तळेहिप्परगा गावात आगमन झाल्यानंतर मराठा सेवा संघ आणि डॉ. ईश्वर जाधव मित्र परिवार यांच्याकडून पालखीत सहभागी झालेल्या वारकर्यांना मिनरल वॉटरचे वितरण करण्यात आले. यावेळी हिप्परगा गावचे सरपंच सचिन भिंगारे, मराठा सेवा संघ, संभाजी ब्रिगेडचे पदाधिकारी मोठ्या संख्येने उपस्थित होते.
'गण गण गणात बोते' चा जयघोष करीत संतश्रेष्ठ गजानन महाराज पालखी तुळजापूरकडून मंगळवारी सोलापूर जिल्ह्यात प्रवेश केली. त्यानंतर उळे येथे मुक्काम करून बुधवारी सकाळी पालखी सोलापूर शहराकडे मार्गस्थ होत असताना तळे हिप्परगा येथील मश्रृम गणपती मंदिरसमोर आली. त्यावेळी तळेहिप्परगा ग्रामस्थांनी मोठ्या भक्तीभावाने पालखीचे स्वागत केले. सेवानिवृत्त शिक्षक लिंबराज जाधव यांनी प्रारंभी सपत्नीक पालखीतील गजानन महाराज यांच्या मुर्तीची पुजा केली.
