.jpeg)
सोलापूर : बनावट सोने गहाण ठेऊन बँकेची ८६ लाख रुपयांच्या फसवणूक प्रकरणात गुन्हा केल्याचे प्रथमदर्शनी दिसून येत नाही, आरोपींविरुद्ध खोटा गुन्हा दाखल केलेला आहे, आरोपी हे सोलापूरचे रहिवासी असून ते तपासकामी सहकार्य करण्यास तयार आहेत, असा आरोपींचे वकील अॅड. रियाज एन. शेख यांनी केलेला युक्तिवाद ग्राह्य धरून येथील सत्र न्यायाधीश पी.एस. खुणे यांनी तीन आरोपींचा अंतरिम अटकपूर्व जामीन मंजूर केला.
या घटनेची थोडक्यात पार्श्वभूमी अशी की, अनिल कुमार बालाजी शहापूरवाड (रा. विजापूर रोड, सोलापूर) हे कॅनरा बँक, चाटी गल्ली, सोलापूर येथील बँकेचे चीफ मॅनेजर असून कॅनरा बँकेच्या सोलापुरात ४ शाखा आहेत.त्या ४ शाखांमध्ये सोने तारण कर्ज देण्याची सुविधा असून सदर सुविधा घेण्याकरिता आरोपींनी कर्ज मागणी अर्ज केला. त्यानंतर गहाण ठेवणारे सोने हे बँकेचे नेमलेले सोनार सुनील नारायण वेदपाठक यांच्याकडून तपासून घेऊन त्याचे मूल्यांकन करून त्या मूल्यांकनाच्या आधारे १३ खातेदारांना विविध शाखांच्यामार्फत २४ तारण कर्ज प्रकरण मंजूर करून बँकेने एकूण ८५, ९३, ३०० इतक्या रकमेचे कर्ज दिले.
हे तारण ठेवलेल्या सोन्याची फेर तपासणी केली असता, ते सोने बनावट असल्याचे दिसून आल्याने व बँकेची बनावट मूल्यांकन कागदपत्र व बनावट सोने गहाण ठेऊ न फसवणूक केल्याचे निष्पन्न झाल्याने अनिल कुमार शहापूरवाड यांनी १३ जून २०२४ रोजी जोडभावी पेठ पोलीस स्टेशन येथे फिर्याद दिली. त्यानुसार जोडभावी पेठ पोलीस ठाण्यात १४ आरोपीविरुद्ध संगणमत करून फसवणूक केल्याचा गुन्हा दाखल झाला. या गुन्ह्याचा तपास हा आर्थिक गुन्हे शाखेचे पोलीस उपनिरीक्षक मोहन व्ही. पवार यांच्याकडे देण्यात आलेला होता.
दाखल गुन्ह्यामध्ये आरोपी जुबेर जगरीस मुल्ला, मुबारक जैनुद्दीन शेख, कदीर मलिक पठाण (सर्व रा. शेळगी, सोलापूर) यांची नावे आल्याने त्यांनी अॅड. रियाज एन. शेख यांच्या वतीने नुकत्याच लागू झालेल्या भारतीय नागरिक सुरक्षा संहिता या नवीन कायद्याच्या कलम 482 अन्वये अटकपूर्व जामीन अर्ज सोलापूर येथील सत्र न्यायालयामध्ये सादर केला होता.
या जामीन अर्जामध्ये आरोपींच्या वतीने अंतरिम जामीन मिळण्याकरिता अॅड. रियाज एन. शेख यांनी युक्तिवाद केला. सदर युक्तिवाद वेळी आरोपींनी गहाण ठेवलेले सोने हे बनावट नसून पूर्णपणे ओरिजनल आहे, बँकेच्या कर्मचाऱ्यांनी परस्पर त्या सोन्यामध्ये फेरफार केल्याची शक्यता नाकारता येत नाही, सोन्याचे तारण ठेवण्यापूर्वी मूल्यांकन करणारे व त्याची खात्री पटवणारे हे बँकेचे अधिकारी व कर्मचारी असून त्यामध्ये आरोपींचा कोणताही हस्तक्षेप नाही.
आरोपींनी कोणताही गुन्हा केलेला प्रथमदर्शनी दिसून येत नाही, आरोपींच्या विरुद्ध खोटा गुन्हा दाखल केलेला आहे, आरोपी हे सोलापूरचे रहिवासी असून ते तपासकामी सहकार्य करण्यास तयार आहेत, असा युक्तिवाद केला सदरचा युक्तिवाद ग्राह्य धरून सोलापूर येथील सत्र न्यायाधीश पी.एस. खुणे यांनी आरोपी जुबेर जगरीस मुल्ला, मुबारक जैनुद्दीन शेख, कदीर मलिक पठाण (सर्व रा. शेळगी, सोलापूर) या तिघांना अंतरिम अटकपूर्व जामीन मंजूर केला.
सदर प्रकरणामध्ये आरोपी कर्जदार यांच्यातर्फे अॅड. रियाज एन. शेख, अॅड. अंजली बाबरे, अॅड. अजय राठोड यांनी काम पाहिले.
..... हे आहे प्रकरण !
कॅनरा बँकेच्या सोलापूर शहरांमधील विविध शाखांमध्ये दिनांक १ फेब्रुवारी ते २८ मे २०२४ या कालावधीमध्ये कॅनरा बँकेच्या सोने मूल्यमापन करणारे सोनार सुनील नारायण वेदपाठक यांच्याशी १३ जणांनी संगणमत करून २२५५ ग्रॅम बनावट सोने तारण ठेऊन बँकेची ८५,९३,३०० इतक्या रकमेची कर्ज घेऊन फसवणूक केल्याप्रकरणी जोडभावी पेठ पोलीस स्टेशन येथे दिनांक १३ जून रोजी दाखल झाला.
