सोलापूर : परिसरातील सामान्य नागरिकांना शिवीगाळ-मारहाण, दमदाटी करुन गंभीर दुखापत करणे, घातक शस्त्राचा वापर करुन दहशत निर्माण करणे, सार्वजनिक मालमत्तेचे नुकसान करणे, गैरकायद्याची मंडळी जमा करुन दंगा करणे, अशा प्रकारचे गंभीर स्वरूपाचे गुन्हे दाखल असलेल्या रोहन सुरेश जाधव (वय - २७ वर्षे) याला २ जिल्ह्यातून तडीपार करण्यात आलंय.
विजापूर नाका पोलीस स्टेशन हद्दीत सराईत गुन्हे करणारा गुन्हेगार रोहन सुरेश जाधव (रा. घर नं ३३० १/ब स्वामी विवेकानंद नगर, सैफुल, विजापूर रोड, सोलापूर) याच्याविरुध्द गंभीर स्वरूपाचे ०४ गुन्हे दाखल आहेत.
त्यामुळे त्याचेविरूध्द महाराष्ट्र पोलीस अधिनियम १९५१ चे कलम ५६ (१) (अ) (ब) प्रमाणे पोलीस उपायुक्त (परिमंडळ) यांचे आदेश पारित झाले होते. त्यास दि. १२ एप्रिल रोजी विजापुर नाका पोलीस स्टेशनकडून ताब्यात घेऊन सोलापूर शहर, उर्वरित सोलापुर जिल्हा व धाराशिव जिल्हातून दोन वर्षाकरीता तडीपार करण्यात आलेले आहे. त्यास तडीपार केल्यानंतर इंडी ता. इंडी जि. विजयपूर येथे सोडण्यात आलेले आहे.
आगामी काळात विविध जातीधर्माचे सण-उत्सव, मिरवणुका व लोकसभा सार्वत्रिक निवडणुकीच्या अनुषंगाने सोलापूर शहर व परिसरात कोणत्याही प्रकारचा अनुचित प्रकार घडू नये, म्हणून शहरात कायदा व सुव्यवस्था तसेच शांतता अबाधित राहण्याच्या उद्देशाने ही कारवाई करण्यात आलीय.
ही कामगिरी पोलीस आयुक्त एम. राजकुमार यांच्या मार्गदर्शनाखाली पोलीस उपायुक्त (परिमंडळ) विजय कबाडे, सहा. पोलीस आयुक्त (विभाग ०२) अजय परमार, वपोनि विजापूर नाका पोलीस स्टेशन दादा गायकवाड, दुपोनि संगीता पाटील, सपोनि शितलकुमार गायकवाड, पोशि/१४८९ रमेश कोर्सेगांव यांनी केलीय.
