सोलापूर : भारतीय निवडणूक आयोगाने आगामी सार्वत्रिक लोकसभा निवडणुकीच्या प्रक्रियेची शनिवारी दुपारी घोषणा केली. त्यानुसार महाराष्ट्रात ०५ टप्प्यात मतदान प्रक्रिया पार पडणार आहे. राज्यातील तिसऱ्या टप्प्यात सोलापूर, माढा, रायगड, बारामती, धाराशीव, लातूरसह ११ लोकसभा मतदान होणार आहे. या लक्षवेधी निवडणुकीची मतमोजणी ०४ जून रोजी होणार असून ०६ जून रोजी निवडणूक प्रक्रियेची समाप्ती होणार असल्याची घोषणा झालीय.
निवडणूक आयोगाच्या घोषणेनुसार महाराष्ट्रात लोकसभेसाठी पाच टप्प्यात मतदान होणार आहे. देशभरात १९, २६ एप्रिल, ७, १३,२०, २५ मे आणि १ जून रोजी मतदान होणार आहे. लोकसभा निवडणुकीच्या कार्यक्रमाची घोषणा होताच आचारसंहितेचा अंमल सर्वत्र लागू झाला आहे.
महाराष्ट्रातील ४८ जागांसाठी पहिल्या टप्प्यात १९ एप्रिल रोजी रामटेक, नागपूर, भंडारा-गोंदीया, गडचिरोली-चिमूर, चंद्रपूर या ०५ लोकसभा मतदार संघात मतदान होणार आहे. दुसऱ्या टप्प्यात २६ एप्रिल रोजी बुलडाणा, अकोला, अमरावती, वर्धा, यवतमाळ-वाशिम, हिंगोली, नांदेड, परभणी या ०८ मतदारसंघात मतदान होत आहे.
तिसऱ्या टप्प्यात ०७ मे रोजी सोलापूर जिल्ह्यातील सोलापूर आणि माढा लोकसभा मतदारसंघात मतदान होत असून याबरोबर रायगड, बारामती, धाराशीव, लातूर, सांगली, सातारा, रत्नागिरी-सिंधुदुर्ग, कोल्हापूर आणि हातकणंगले या ११ मतदार संघात मतदान होणार आहे.
राज्यातील चौथ्या टप्प्यात १३ मे रोजी नंदूरबार, जळगांव, रावेर, जालना, छत्रपती संभाजीनगर, मावळ, पुणे, शिरुर, अहमदनगर, शिर्डी आणि बीड या ११ मतदारसंघात तर पाचव्या आणि अंतिम टप्प्यात २० मे रोजी धुळे, दिंडोरी, नाशिक, पालघर, भिवंडी, कल्याण, ठाणे, मुंबईतील सहा मतदारसंघ अशा १३ मतदारसंघात लोकसभेसाठी मतदान होणार आहे.
................ चौकट ..........
⭕ सोलापूर लोकसभा निवडणूक-२०२४ वेळापत्रक
◾️आचारसंहिता प्रारंभ : १६ मार्च २०२४
◾️नामनिर्देशन अर्ज : १२ एप्रिल २०२४
◾️उमेदवारी अर्ज छाननी : २० एप्रिल २०२४
◾️उमेदवारी अर्ज माघारी घेणे : २२ एप्रिल २०२४
◾️मतदान : ०७ मे २०२४
◾️मतमोजणी : ०४ जून २०२४
आणि
◾️निवडणूक प्रक्रिया समाप्ती : ०६ जून २०२४
..............
