सोलापूर : आगामी काळात विविध जातीधर्माचे सण-उत्सव, मिरवणुका व लोकसभा सार्वत्रिक निवडणुकीच्या अनुषंगाने सोलापूर शहर व परिसरात कोणत्याही प्रकारचा अनुचित प्रकार घडू नये, यासाठी पोलीस आयुक्तालयानं सराईत गुन्हेगारांविरूध्द कारवाईस प्रारंभ केलाय. सराईत गुन्हेगार सचिन नागनाथ माने (वय- २५ वर्षे, रा. ८ साई नगर महालिंगेश्वर नगरच्या बाजूला, साखर कारखान्याजवळ, सोलापूर) याला सोलापूर शहर, सोलापूर ग्रामीण आणि धाराशिव जिल्ह्यातून दोन वर्षाकरिता हद्दपार करण्यात आले.
विजापूर नाका पोलीस ठाणे आणि एमआयडीसी पोलीस ठाणे हद्दीत सचिन नागनाथ माने याच्याविरुद्ध गुंडगिरी करणे, शिवीगाळ - दमदाटी करणे मारहाण करून दहशत निर्माण करणे अशा प्रकारचे गंभीर स्वरूपाचे ०३ गुन्हे दाखल आहेत. पोलीस आयुक्तालय हद्दीत शहरात कायदा व सुव्यवस्था तसेच शांतता अबाधित राहण्याच्या उद्देशाने त्याच्याविरूध्द महाराष्ट्र पोलीस अधिनियम १९५१ चे कलम ५६ (१) (अ) (ब) प्रमाणे पोलीस उपायुक्त परिमंडळ, सोलापूर शहर यांचे आदेश पारित झाले होते. त्यास, २५ फेब्रुवारी रोजी विजापुर नाका पोलीस स्टेशनकडून ताब्यात घेऊन सोलापूर शहर व उर्वरित सोलापूर जिल्हा व धाराशिव जिल्ह्यातून दोन वर्षाकरीता हद्दपार करण्यात आले.
ही कामगिरी पोलीस आयुक्त एम. राजकुमार यांच्या मार्गदर्शनाखाली पोलीस उपायुक्त (परिमंडळ) विजय कबाडे, सहा. पोलीस आयुक्त (विभाग ०२) अजय परमार, वपोनि विजापुर नाका पोलीस स्टेशन शहाजी पवार, दुपोनि उमाकांत शिंदे, पोसई मुकेश गायकवाड, पोशि/१४८९ रमेश कोर्सेगांव यांनी केली.
