सोलापूर : छत्रपती शिवाजी महाराज यांच्या जयंतीनिमित्त थोरला मंगळवेढा तालमी वतीने २१ हजार शिवभक्तांच्या शिव भोजनाचा उपक्रम हाती घेण्यात आलाय. शिवभोजन कार्यक्रमाचं उद्घाटन राज्याचे आरोग्यमंत्री डॉ. तानाजी सावंत यांच्या हस्ते शिवपुजन करून करण्यात येईल. याप्रसंगी पोलिस आयुक्त एम.राजकुमार, सोलापूर महानगरपालिका आयुक्त शीतल तेली-उगले, शिवसेना संपर्क प्रमुख प्रा. शिवाजी सावंत,अक्कलकोट अन्नछत्र मंडळाचे अमोलराजे भोसले, दिलीप कोल्हे, मनोज शेजवाल यांच्यासह शहरातील मान्यवर तसेच अधिकारी यांच्य उपस्थितीत हा कायर्क्रम संपन्न होणार आहे, अशी माहिती अमोल बापू शिंदे यांनी पत्रकार परिषदेत दिली.
महाराष्ट्राचं आराध्य दैवत छत्रपती शिवाजी महाराज यांच्या जयंती देश-विदेशात विविध उपक्रमांनी साजरी होते. राज्यात अनेक मंडळांनी विविध उपक्रमाचे आयोजन केलं आहे. सोलापूर शहरात छत्रपती शिवाजी महाराज यांची जयंती मोठ्या प्रमाणात साजरी होते. शिवजन्मोत्सवानिमित्त शिवभक्तांसाठी आणि बंदोबस्तासाठी असणाऱ्या पोलीस बांधवांसाठी तसेच शहर जिल्ह्यातून येणाऱ्या शिवप्रेमींसाठी २१ हजार शिवभक्तांसाठी शिवभोजनाच आयोजन थोरला मंगळवेढा तालीम मंडळातर्फे करण्यात आलं आहे, असं अमोलबापू शिंदे यांनी प्रारंभी म्हटले.
शिवजयंतीच्या सोलापूर शहरात भव्य मिरवणुका निघतात शहरातील हॉटेल बंद असतात. मिरवणूक पाहण्यासाठी आलेल्या शहर आणि जिल्ह्यातील शिवप्रेमींची गैरसोय होते, हे लक्षात घेऊन मिरवणुकीस फाटा देऊन छत्रपती शिवाजी महाराजांच्या चरणी शिवभक्तांना पोटभर जेवण देऊन शिवभक्तांना तृप्त करण्याचा उपक्रम थोरला मंगळवेढा तालमी वतीने मागील अनेक वर्षापासून सुरु केला आहे.
सुरुवातीस ०७ हजार नंतर ११ हजार शिवभक्तांनी भोजनाचा आस्वाद घेतला. या उपक्रमाचे संपूर्ण महाराष्ट्रभर कौतुक झाले आहे. मिरवणुक बंदोबस्तासाठी असलेल्या पोलीस बांधवांची बंदोबस्तावेळी होणारी जेवणाची गैरसोय लक्षात घेऊन पोलीस बांधवांसाठी स्वतंत्र व्यवस्था आयोजकांकडून करण्यात आलीय.
१९ फेब्रुवारी रोजी सायंकाळी सहा ते रात्री बारा वाजेपर्यंत हा उपक्रम छत्रपती शिवाजी महाराज चौकातील यात्री कॉटेज येथे बाजी अण्णा मठाजवळ टेबल खुर्चीवर शिवभोजन होणार आहे. सर्व शिवभक्तांनी याचा लाभ घ्यावा, यंदा २१ हजार शिवभक्तांना भोजन देण्याचा संकल्प असल्याची माहिती थोरला मंगळवेढा तालमीचे आधारस्तंभ शिवसेना जिल्हाप्रमुख अमोल बापू शिंदे यांनी केला आहे. कुशल संघटक संकेत पिसे यांच्या नियोजनात हा उपक्रम होणार आहे.
यावेळी सागर पिसे, संतोष माळी, अमोल कदम, समीर लोंढे हजर होते.
