अमानुष अन् क्रूरतेची परिसीमा ओलांडली ! शेतीच्या वादातून हत्या; शिर घेऊन आरोपींचं पलायन

अमानुष अन् क्रूरतेची परिसीमा ओलांडली ! 

शेतीच्या वादातून हत्या; शिर घेऊन आरोपींचं पलायन

टेंभुर्णी : वाद-विवादात कधीच कोणाचा कल्याण होत नाही, असं नेहमीच म्हटलं जातं. तरीसुद्धा समाजात वादविवाद, तंटे -बखेडे नेहमीच पाहायला मिळतात. त्यात भावकीचा वाद म्हटलं की, तो कधी कोणत्या टोकाला जाईल, याचा नेम नसतो. अशीच अमानुष अन् क्रूरतेची परिसीमा ओलांडणारी घटना माढा तालुक्यात सोमवारी, ११ डिसेंबर रोजी घडलीय. शेतीच्या वादातून भावकीतील चौघांनी एका ६५ वर्षीय वृध्दाची कुऱ्हाडीने मुंडके तोडून, मृताचे शिर घेऊन ते फरारी झाले. या घटनेनंतर भयाचं वातावरण पसरलंय.

शेवरे गावच्या हद्दीतील कुरणवस्ती येथे शेतीच्या कारणावरुन जाधव परिवारात भांडण होते. त्यातूनच ही क्रूरतेची परिसीमा ओलांडणारी घटना घडलीय. ६५ वर्षीय वृद्धाचा भावकीतील चौघा जणांनी कुऱ्हाडीने शिर तोडून धडावेगळे केले, हा थरारक प्रकार सोमवारी सकाळी १०.३० वा. च्या सुमारास घडला. संशयितांनी मृताचं धड घटनास्थळी टाकून शिर घेऊन घटनास्थळावरून पलायन केलंय.

शंकर प्रल्हाद जाधव (वय ६५, रा. कुरणवस्ती, शेवरे) असं मृताचं नांव आहे. शंकर जाधव यांचं ०३ दिवसांपूर्वी डोळ्याचे ऑपरेशन झाले होते, म्हणून ते घरी एकटेच झोपले होते. त्यावेळी भावकीतील चौघांनी मिळून शेतीच्या कारणावरून शंकर जाधव यांच्या घरी जाऊन कुऱ्हाडीने शंकर जाधव यांच्या मानेवर-गळ्यावर वार करून त्यांचं शिर धडावेगळे केले व त्यांचे मुंडके सोबत घेऊन ते पसार झाले. 

शंकर जाधव यांची अमानुष व क्रूर पद्धतीने हत्या झाल्याने पंचक्रोशीत भीतीचे वातावरण पसरलं आहे. याबाबत नरहरी नवनाथ बंडलकर (रा.शेवरे) यांनी टेंभुर्णी  पोलीस ठाण्यात फिर्याद दाखल केली. पोलीस निरीक्षक दीपक पाटील यांच्या मार्गदर्शनाखाली सहायक पोलीस निरीक्षक जोग या गुन्ह्याचा अधिक तपास करीत आहे