सोलापूर : एमआयडीसी पोलीस स्टेशनच्या हद्दीतील सराईत गुन्हेगार संदीप प्रल्हाद चव्हाण यास एमपीडीए कायद्यान्वये स्थानबद्ध करून त्याची पुणे येथील येरवडा कारागृहात रवानगी करण्यात आली. पोलीस आयुक्त डॉ. राजेंद्र माने यांनी पोलीस आयुक्तालयाचा पदभार स्वीकारल्यापासून ही १९ वी तर या वर्षातील १५ वी कारवाई असल्याचे माहिती कक्षातून सांगण्यात आले.
सोलापूर शहरातील घरफोडीसह अन्य गुन्ह्यातील सराईत गुन्हेगार संदीप प्रल्हाद चव्हाण (वय - ३८ वर्षे, रा, पारधी वस्ती, मुळेगांव, हल्ली रेणुका नगर, जुना विडी घरकुल, सोलापूर) याच्याविरुद्ध एमआयडीसी, जोडभावी पेठ आणि सलगर वस्ती पोलीस ठाण्याच्या दप्तरी अनेक दाखल आहेत. संदीप चव्हाण हा मागील काही वर्षांपासून सातत्याने घातक शस्त्राचा वापर करुन जबरी चोरी, घरफोडी, गैरकायद्याची मंडळी जमविणे, दुखापत करणे, खंडणी मागणे आणि धमकी देणे यासारखे गंभीर स्वरुपाचे गुन्हे साथीदारांच्या मदतीने, अवैध आर्थिक फायदा मिळवण्यासाठी करीत आला आहे.
त्याच्याविरुध्द अशा प्रकारे गंभीर स्वरुपाचे एकूण १० गुन्हे सोलापूर शहरात दाखल आहेत. त्याच्या या गुन्हेगारी कृत्यामुळे सोलापूर शहरातील नागरीकांचे दैनंदिन जीवन विस्कळीत होऊन, सार्वजनिक सुव्यवस्थेस बाधा निर्माण झाली आहे. संदिप चव्हाण याच्या गुन्हेगारी कृत्यामुळे, त्याची सोलापुर शहरातील व्यापारी व सामान्य नागरीकांमध्ये दहशत असून, त्याच्याविरुध्द सामान्य नागरीक उघडपणे पोलीसांना माहीती देत नाहीत.
संदिप चव्हाण यास त्याच्या गुन्हेगारी कारवायापासून परावृत्त करण्यासाठी सन २०२१ मध्ये क.५५ महाराष्ट्र पोलीस अधिनियमानुसार प्रतिबंधक (तडीपार) कारवाई करण्यात आली होती. त्यानंतरही संदिप चव्हाण याच्या वर्तनात कोणताच बदल झाला नाही आणि त्याने सार्वजनिक सुव्यवस्थेस बाधा होईल अशी वरीलप्रमाणे गुन्हेगारी कृत्य चालु ठेवली.
त्यामुळे त्याचे गुन्हेगारी कृत्यास वेळीच प्रतिबंध करण्यासाठी, पोलीस आयुक्त डॉ. राजेंद्र माने यांनी, शुक्रवारी २९ डिसेंबर रोजी त्याच्याविरुध्द एमपीडीए अधिनियम, १९८१ चे कलम ३ अन्वये स्थानबध्दतेचे आदेश निर्गमित करुन, त्यास शनिवारी, ३० डिसेंबर रोजी स्थानबध्द आदेशाची बजावणी करण्यात आली.
ही कारवाई पोलीस आयुक्त डॉ. राजेंद्र माने यांच्या मार्गदर्शनाखाली, पोलीस उप-आयुक्त (गुन्हे/विशा) डॉ. दीपाली काळे, पोलीस उप-आयुक्त (परिमंडळ) विजय कबाडे, सहाय्यक पोलीस आयुक्त(गुन्हे) प्रांजली सोनवणे, सहाय्यक पोलीस आयुक्त (विभाग-०१) डॉ. संतोष गायकवाड, वरिष्ठ पोलीस निरीक्षक (गुन्हे) सुनिल दोरगे, एमआयडीसी पोलीस ठाण्याच्या वरिष्ठ पोलीस निरीक्षक श्रीमती अश्विनी भोसले, पोउपनि विशेंद्रसिंग बायस व एमपीडीए पथकातील अंमलदार पोहेकॉ-/८३३ विनायक संगमवार, पोहेकॉ/१२५४ सुदीप शिंदे, पोशि/१९१६ अक्षय जाधव, पोशि/६५४ विशाल नवले यांनी पार पाडली.
