भंडारा : जिल्ह्यातील आमगाव (दिघोरी) येथे तान्हा पोळ्याचा सण मोठ्या उत्साहात साजरा करण्यात आला. येथील ग्रामपंचायत परिसरातील वॉर्ड क्रमांक 4 मध्ये 'बालमित्र तान्हा पोळा मंडळा' च्या पुढाकाराने आयोजित कार्यक्रमाला बच्चे कंपनीचा आणि नागरिकांचा उदंड प्रतिसाद मिळाला.
या कार्यक्रमाचं वैशिष्ट्य म्हणजे गावातील तरुण मुलांचा यातला सक्रिय सहभाग. उमेश हजारे, सौरभ गायकवाड, नरेंद्र चौधरी, अनमोल राऊत, आकाश भोतमांगे, निलेश उके, साहिल भजे, हितेश शेंद्रे, सचिन मेश्राम, शिवचरण तायवाडे, मंगेश बोन्द्रे, गणेश खंडते, श्रेयश भजे, प्रवीण भजे, सुजित निंबार्ते आणि विनायक चोले यांसारख्या अनेक तरुणांनी हा कार्यक्रम यशस्वी करण्यासाठी मेहनत घेतली.
लहान मुलांनी सजवलेले आपले छोटे-छोटे लाकडी बैल, तरुणाईचा उत्साह आणि नागरिकांची गर्दी यामुळे संपूर्ण परिसरात एक आनंदी आणि सणाचं वातावरण निर्माण झालं होतं. या तरुणांच्या उत्साहाला साथ देत वॉर्डातील नागरिकही मोठ्या संख्येने उपस्थित होते, ज्यामुळे कार्यक्रमाला एक वेगळीच रंगत आली.
