सोलापूर : पिस्टल अन् कोयत्याच्या धाकाने सराफी दुकानात दरोडा टाकण्याच्या प्रयत्नात फसलेल्या संशयितांना पोलीस आयुक्तालयाच्या गुन्हे शाखेनं गजाआड केलंय. त्यांच्याकडून गुन्ह्यात वापरलेल्या 02 दुचाकी आणि गुन्ह्यात वापरलेली शस्त्रं जप्त करण्यात आलीत. या आरोपींच्या चौकशीत वळसंग पोलिसांकडील जबरी चोरीचा एक गुन्हा उघडकीस आल्याचे सांगण्यात आलंय.
अगदी चित्रपटातील एखाद्या लुटीच्या प्रसंगाला साजेशा घटनेत, सुनियोजित कट करून आरटीओ कार्यालय रस्त्यावर असलेल्या समर्थ ज्वेलर्स या सराफी दुकानात पिस्टल आणि कोयत्याच्या धाकाने दरोडा घालण्याच्या उद्देशाने दोघे दुकानात घुसले होते, तर एक जण दुकानासमोर थांबला होता. त्यांनी धाक दाखवून 'सोन्याचे दागिने बॅगेत भर' अशी धमकी देत असताना, मदतीसाठी आरडा-ओरडा अन् झालेल्या गोंधळात ते पळून गेले. ही थरारक घटना 01 नोव्हेंबरच्या रात्री घडली. त्यात कोयताधारी लुटारूने कोयत्याने काचेचे काऊंटर फोडून सोन्याचे दागिने लुटण्याचा प्रयत्न केला.
याप्रकरणी दीपक दिगंबर वेदपाठक यांनी दाखल केलेल्या तक्रारीनुसार विजापूर नाका पोलिसांकडे अज्ञात आरोपींविरुद्ध गुन्हा दाखल करण्यात आला होता. गुन्ह्याचे गांभीर्य ओळखून वरिष्ठ पोलीस निरीक्षक अरविंद माने (गुन्हे शाखा) यांनी वरिष्ठ पोलीस अधिकाऱ्यांच्या सूचना व मार्गदर्शनानुसार गुन्हे शाखेकडील पोलीस अधिकारी व अंमलदार यांची 07 तपास पथके तयार करून त्यांना सोलापूर शहरातील वेगवेगळ्या ठिकाणचे सी. सी. टी. व्ही फुटेजची बारकाईने पाहणी करण्याच्या व तांत्रीक विश्लेषण करण्याच्या सूचना दिल्या.
त्यानुसार गुन्हे शाखेकडील स.पो.नि. शैलेश खेडकर, शंकर धायगुडे, विजय पाटील, निलेश पाटील-सोनवणे, तुकाराम घाडगे दत्तात्रय काळे व पोसई मुकेश गायकवाड यांनी गुन्ह्याच्या घटनास्थळापासून सोलापूर शहरातील विविध ठिकाणांचे सुमारे 125 सी.सी.टी.व्ही. कॅमेऱ्यांची तपासणी करून आरोपींची ओळख पटवण्याच्या प्रयत्नात असताना, 03 जण यतीमखाना जवळील मोकळ्या मैदानात बजाज प्लॅटिना कंपनीची मोटार सायकल (एम. एच. 13 ई. ए. 2578) सह थांबल्याची माहिती मिळाली.
गुन्हे शाखेकडील तपास पथकाने सापळा रचून मोटार सायकलवरील 03 संशयीत इसमांना शिताफीने ताब्यात घेतले. त्यांच्याकडे गुन्ह्याच्या अनुषंगाने अधिक विचारपूस करता, साहिल दशरथ गायकवाड (वय-20 वर्षे, रा. भैरू वस्ती, लिमयेवाडी), समर्थ समीर गायकवाड (रा. भैरू वस्ती, सुशिल मराठी शाळेजवळ, सोलापूर) आणि सार्थक दशरथ गायकवाड (रा. 2 नंबर झोपडपट्टी, विठ्ठल मंदिरजवळ, सोलापूर) अशी त्यांची नांवे असल्याचे निष्पन्न झाले.
या घटनेत अजिंक्य चव्हाण व साहील गायकवाड यांनी समर्थ ज्वेलर्समध्ये प्रवेश करून, अजिंक्य चव्हाण याने त्याचे हातातील पिस्टलचा धाक दाखवून तसेच साहील गायकवाड याने दुकान मालकाकडे बॅग टाकून " सोन्याचे दागिने बॅगेत भर" अशी दमदाटी करून हातातील कोयत्याने दुकानातील काचेचे काऊंटर फोडून त्यातील सोन्याचे दागिने जबरदस्तीने चोरून नेण्याचा प्रयत्न केला, मात्र दुकानमालक यांनी, चोर आले म्हणून जोर-जोरात आरडा ओरड केल्याने साहील व अजिंक्य हे दोघे घाबरून निळ्या रंगाचे मोटार सायकलवरून पळून गेले.
तसेच या गुन्ह्यातील पाहिजे आरोपी अनिकेत पांडुरंग गायकवाड याच्याकडून काळ्या रंगाची अॅक्टीव्हा मोटार सायकल जप्त करण्यात येऊन त्यासही ताब्यात घेण्यात आले. या गुन्ह्यातील विधीसंघर्षीत बालकास त्याच्या नातेवाईकासह विजापूर नाका पोलीस ठाण्यास हजर राहण्यासंबंधी समज देण्यात आली.
त्याच प्रमाणे होटगी रोडवरील चौधरी पेट्रोल पंपावर पिस्टल व चाकूचा धाक दाखवून चोरट्यांनी सुमारे 39,000 रूपये जबरीने चोरले होते. या प्रकरणी वळसंग पोलीस ठाण्याकडील दाखल गुन्ह्यात या आरोपींतील समर्थ गायकवाड व अजिंक्य चव्हाण यांचा सहभाग असल्याचं निष्पन्न झाल्यानं तो गुन्हा उघडकीस आणण्यात यश आलंय.
ही कामगिरी पोलीस आयुक्त एम. राज कुमार, पोलीस उप-आयुक्त (मुख्यालय) गौहर हसन, पोलीस उप-आयुक्त (परिमंडळ) विजय कबाडे, पोलीस उप-आयुक्त (गुन्हे/वि.शा.) डॉ. अश्विनी पाटील, सहा. पोलीस आयुक्त (गुन्हे) राजन माने यांच्या मार्गदर्शनाखाली वरिष्ठ पोलीस निरीक्षक, (गुन्हे शाखा) अरविंद माने, स.पो.नि. शैलेश खेडकर, शंकर धायगुडे, विजय पाटील, मुकेश गायकवाड, निलेश पाटील-सोनवणे, तुकाराम घाडगे व दत्तात्रय काळे व त्यांच्या तपास पथकातील पोलीस अंमलदार व सायबरकडील पोलीस अंमलदार यांनी केली.
... इथं शिजला होता दरोड्याचा कट !
या गुन्ह्याच्या तपासात साहील गायकवाड याच्याकडून मिळालेल्या माहितीनुसार घटने दिवशी दुपारी 03.30 चे सुमारास साहील मित्र अजिंक्य चव्हाण (रा. वारजे माळवाडी, पुणे), विशाल जाधव (रा. तुळजापूर), समर्थ समिर गायकवाड, सार्थक दशरथ गायकवाड, अनिकेत पांडुरंग गायकवाड (सर्व रा. सोलापूर) व एक विधिसंघर्षीत बालक यांनी दमाणी नगरमधील गोल्ड जिम समोरील मैदानात एकत्र जमले. त्या ठिकाणी वरील सर्वांनी आरटीओ ऑफीस जवळ समर्थ ज्वेलर्स नावाचे दुकान लुटण्याचा कट केला.
त्यावेळी अजिंक्य चव्हाण याच्याकडील पिस्टल व 03 काडतुसे व साहील गायकवाड याने त्याचेकडील लोखंडी कोयता असे शस्त्रासह एकत्र जमले होते. तत्पूर्वी आरोपी अजिंक्य चव्हाण याचे ताब्यातील विना नंबर प्लेटची पांढऱ्या रंगाची अॅक्टीव्हा गाडीची ओळख पटू नये, यासाठी गाडीस निळ्या पेंट स्प्रेने रंगविले.
त्यानंतर नमूद निळ्या अॅक्टीव्हा गाडीवर अजिंक्य चव्हाण, विशाल जाधव व साहील गायकवाड हे तसेच समर्थ गायकवाड, सार्थक गायकवाड व विधी संघर्षीत बालक असे प्लॅटिना मोटार सायकलवरून आर.टो.ओ. रोड येथील समर्थ ज्वेलर्स शॉपजवळ आले होते.
दरोड्याचा प्रयत्न फसल्यावर सर्व जण एकत्रित लिमयेवाडी येथील समर्थ गायकवाड यांचे घराजवळील बोळात निळया अॅक्टीव्हा गाडीचा रंग पेट्रोलने धुतला. त्यांना ताब्यात घेऊन त्यांच्या अंगझडतीत लोखंडी कोयता, बजाज प्लॅटीना कंपनीची मोटार सायकल व मोबाईल फोन जप्त करण्यात आले.
... अन्य तिघे होते, दुकानाच्या आसपास !
अजिंक्य चव्हाण व साहील गायकवाड हे तोंडास मास्क बांधून समर्थ ज्वेलर्स दुकानात शिरले व विशाल जाधव हा दुकानाचे बाहेर गाडीवरच थांबून राहिला. तसेच उर्वरीत तिघे हे सोन्याचे दागिने लुटताना काही गडबड झाल्यास त्यांना मदत करण्यासाठी समर्थ ज्वेलर्स दुकानाचे आसपासच थांबून होते, असंही तपासात पुढं आलंय.
