सोलापूर : तरुणांनी भरपूर अभ्यास करावा. अपयश आले म्हणून खचून वा नैराश्यात न जाता प्रत्येक संकटांचा सामना करत जिद्दीने यश मिळवावं, असा संदेश पोलीस आयुक्त एम. राजकुमार यांनी उपस्थित तरुणाईला दिला.
प्रार्थना फाऊंडेशन व सेवादायी सोशल फाऊंडेशन आयोजित तिसऱ्या कृतिशील तरुणाई शिबिराचे उद्घाटन मोरवंची येथे पार पडले. दीप प्रज्वलन करून कार्यक्रमाची सुरुवात करण्यात आली. या शिबिराच्या उद्घाटन प्रसंगी सोलापूरचे पोलीस आयुक्त एम. राज कुमार व त्यांच्या पत्नी रम्या कन्नन प्रमुख अतिथी म्हणून उपस्थित होत्या.
तरुणाईमध्ये सामाजिक भान निर्माण करण्यासाठी व त्यांचा व्यक्तिमत्त्व विकास व्हावा आणि त्यातून एक समाजभान जपणारी सक्षम पिढी निर्माण व्हावी, यासाठी कृतिशील तरुणाई शिबिराचे आयोजन केले जाते. कृतिशील तरुणाई शिबिराचे हे तिसरं वर्ष आहे.
या शिबिरासाठी महाराष्ट्रभरातून सामाजिक विचारांची, स्वतःमध्ये बदल करून समाजात कृतिशील बदल घडवू पाहणाऱ्या तरुण-तरुणींचा सहभाग असतो. स्वतःला मानसिकदृष्ट्या सक्षम व स्थिर ठेऊन जीवनाची वाटचाल कशी करावी, यासंबंधी स्वतःला मानसिकदृष्ट्या सक्षम व स्थिर ठेऊन जीवनाची वाटचाल कशी करावी, यासंबंधी प्रमुख अतिथी रम्या कन्नन यांनी शिबिरार्थींना मार्गदर्शन केले.
प्रार्थना फाऊंडेशन चे कार्य हे समाजाला दिशा देणारे आहे. समाजातील वंचित, गरजू वृद्ध व मुलांना आधार देऊन त्यांना सक्षम बनवण्याचे कार्य संस्था करत आहे. संस्थेच्या माध्यमातून असंच समाज हिताचे कार्य घडत राहावे, या सदिच्छाही पोलीस आयुक्त एम. राज कुमार यांनी यावेळी व्यक्त केल्या.
शिबिराच्या उद्घाटन प्रसंगी प्रार्थना फाऊंडेशन च्या अनु मोहिते, प्रसाद मोहिते, शुभम मिसाळ, सेवादाई सोशल फाऊंडेशन चे विष्णू भोसले, साहिल तुपे आदी मान्यवर उपस्थित होते.
