सोलापूर : येथील बांधकाम क्षेत्रात काम करणाऱ्या कामगारांच्या योजनेत सहाय्यक कामगार आयुक्त कार्यालयातील अधिकारी, कर्मचारी आणि गृह उपयोगी वस्तु (संच) वाटप करणारे ठेकेदार यांच्याकडून मोठ्या प्रमाणात भ्रष्टाचार व मनमानी कारभार चालू आहे. हा भ्रष्टाचार रोखण्यासाठी महाराष्ट्र कामगार सेना, सह्याद्री कामगार संघटना, बहुजन पॅंथर सेना, संघर्ष कामगार संघटना व भ्रष्टाचार विरोधी संघटनांनी एकत्रित येऊन सहाय्यक कामगार आयुक्त कार्यालयासमोर अर्धनग्न आंदोलन केले.
बांधकाम कामगारांकडून हजार ते दीड हजार पैसे घेऊन कामकाज केले जाते, केवळ सोलापूर जिल्ह्यात 2 लाख कामगारांची नोंदणी झालेली आहे. यावरून महाराष्ट्र शासन व बांधकाम कामगार कल्याणकारी मंडळ यांच्या संयुक्तपणे सुरू असलेला बांधकाम कामगार योजनेत कोट्यावधी रुपयांचे भ्रष्टाचार झाल्याचे दिसून येते, असा आंदोलनात सहभागी झालेल्या विविध संघटनांचा आरोप आहे.
शासन व प्रशासनाकडून होत असलेल्या भ्रष्टाचार रोखण्यासाठी व बांधकाम कामगारांची पिळवणूक व लूट थांबविण्याच्या मागणीसाठी 30 सप्टेंबर रोजी सहाय्यक कामागर आयुक्तांना बांधकाम कामगार शिबीरे व टोकण वाटप पध्दत बंद करण्याचे निवेदन दिले, परंतु सहाय्यक कामगार आयुक्तांकडून कुठलीही कारवाई झाली नाही. त्याच्या निषेधार्थ सोमवारी, 07 ऑक्टोबर रोजी विष्णु कारमपुरी, बालाजी चराटे, गणेश बोड्डू, अंगद जाधव, सुहेल शेख यांच्या नेतृत्वाखाली अर्धनग्न आंदोलन करण्यात आले.
यावेळी आंदोलक कामगारांनी बंद करा - बंद करा – टोकण वाटप बंद करा, संयुक्त कामगार आघाडीचा विजय असो, सहाय्यक कामगार आयुक्तांचा धिक्कार असो, गरीब बांधकाम कामगारांकडून पैसे लुटणाऱ्या हरामखोरांना अटक करा, अशा घोषणा देऊन शासनाची कार्यपध्दती आणि टोकण पध्दती बंद व ठेकेदारी बेकायदेशीर शिबीरे बंद न झाल्यास मुख्यमंत्री यांना सोलापूर दौऱ्यात काळे झेंडे दाखविण्यात येईल, असाही इशारा संयुक्त कामगार आघाडीच्या वतीने यावेळी देण्यात आला.
सहाय्यक कामगार आयुक्त यांच्या कार्यालयासमोर सकाळी 11 वाजता संयुक्त कामगार आघाडी आंदोलनात विष्णु कारमपुरी, अंगद जाधव, गणेश बोड्डू, बालाजी चराटे, सुहेल शेख, वैशाली बनसोडे यांनी शासनाविरुध्द भ्रष्टाचाराचे जोरदार प्रहार केला. आणि बांधकाम कामगारांना न्याय न देणाऱ्या सरकारला येणाऱ्या निवडणुकीला त्यांची जागा दाखवू, असेही जाहिर केले.
विष्णु कारमपुरी, अंगद जाधव, गणेश बोड्डू, बालाजी चराटे, सुहेल शेख यांच्या नेतृत्वाखली झालेल्या अर्धनग्न आंदोलनात रेखा आडकी, राधिका मिठ्ठा, लक्ष्मीबाई ईप्पा, विठ्ठल कुऱ्हाडकर, शिवा ढोकळे, गणेश म्हंता, गुरूनाथ कोळी, श्रीनिवास बोगा, ओंकार चराटे, आदित्य भोसले, पवन कोळी, दत्ता कलाटे, प्रशांत जक्का, लहु गायकवाड, जयजीद देवकते, विनय बोड्डू, सोहेल जागीरदार, सपना गजघाटे, दीपक दुधाळे, हेमंत दवळशंकर, सिंकदर मनियार, सादीक शेख, जुब्बेर शेख, केदार देवखुळे, भोळाशंकर अटकर, सतीश असादे, अलका जमदाडे, नाभिका लोखंडे यांच्यासह बांधकाम कामगार बंधु–भगिनी मोठ्या संख्येने उपस्थित होते.
यापुढील आंदोलनात सहभाग होण्याचे आवाहन करताना, विष्णु कारमपुरी यांनी आंदोलनात आलेल्या बंधु–भगिनींचे शेवटी आभार मानले.
