महिला व मुलींना सशक्तीकरणास चालना देण्यासाठी रोजगार निर्मितीचे आयोजन

सोलापूर : महिला व बाल विकास विभागामार्फत महिला व मुलींना रोजगार निर्मितीस चालना देणे, त्यांचे आर्थिक, सामाजिक पुनर्वसन करणे, स्वावलंबी, आत्मनिर्भर करणे, सशक्तीकरणास चालना देण्यासाठी तसेच महिला व मुली यांचा सुरक्षित प्रवास होणे यासाठी "पिंक (गुलाबी) ई-रिक्षा" ही योजना सुरु केली आहे.

या योजनेनुसार सोलापूर शहरातील २०० पात्र महिलांना लाभ देण्याचे लक्ष निश्चित केले आहे. या योजनेनुसार ७० टक्के कर्ज बँकेमार्फत उपलब्ध करुन दिले जाणार असून राज्य शासन २० टक्के आर्थिक भार उचलणार आहे व १० टक्के रक्कम लाभार्थी यांना भरावयाची आहे. पिंक ई-रिक्षा हा महिलांनीच चालवायचा आहे.

या योजनेसाठी पात्रता- लाभार्थीचे कुटुंब महाराष्ट्र राज्याचे रहिवाशी असावे, अर्जदार महिलेचे वय २०-४० वर्षे दरम्यान असावे, अर्जदार महिलेचे बँक खाते असावे, लाभार्थी कुटुंबाचे वार्षिक उत्पन्न ३ लाख रूपयांपेक्षा अधिक नसावे.

तरी इच्छुक पात्र महिलांनी जिल्हा महिला व बाल विकास अधिकारी कार्यालय, सी.एस.नं.1608/09, प्लॉट नं.12 पहिला मजला, शोभा नगर, सात रस्ता, बिग बझारच्या पाठीमागे,सोलापूर येथे अर्जाचा नमूना व अधिक माहितीसाठी संपर्क साधावा, असे आवाहन जिल्हा महिला व बाल विकास अधिकारी यांच्यामार्फत करण्यात येत आहे.