फौजदार चावडी पोलीस ठाणे डी. बी. पथकाची कामगिरी
सोलापूर : रिक्षात बसलेल्या प्रवाशाला लोखंडी रॉड व फायटरचा धाक दाखवून क्युआर कोडवर जबरदस्तीने पैसे काढून घेणाऱ्या सराईत टोळीला फौजदार चावडी पोलीस ठाण्याच्या गुन्हे प्रकटीकरण शाखेच्या पथकानं गजाआड केलंय. या टोळीनं गुन्ह्यात वापरलेली रिक्षासह ३, ९८, ६५० रुपयांचा मुद्देमाल हस्तगत करण्यात आला असल्याचं पोलीस आयुक्तालयाच्या माहिती कक्षातून सांगण्यात आलंय.
फौजदार चावडी पोलीस ठाण्याकडील भा.दं. वि.सं. कलम ३९२,३२३,५०६,३४ प्रमाणे दाखल गुन्ह्यात, बुधवारी, ०५ जून रोजी सायंकाळी सोलापूर-पुणे हायवेवरील बाळे येथील ब्रिजखाली रिक्षा स्टॉप येथून पॅसेंजर सुधाकर गणेश गायकवाड (रा.मोहोळ) यास रिक्षात बसवून त्याच्या बाजूस रिक्षा चालकाच्या ०२ साथीदारांना बसवून ती रिक्षा तुळजापूर रोड डी मार्ट ते कोंडी येथील भारत पेट्रोल पंप येथे घेऊन जाऊन प्रवाशी सुधाकर गायकवाड या ज्येष्ठ नागरिकास लोखंडी रॉड तसेच फायटरचा धाक दाखवून जिवे ठार मारण्याची धमकी देऊन रोख व क्युआर कोडव्दारे ऑनलाईन फोन पे व्दारे असे मिळून १,०७,००० रुपये ट्रान्सफर करुन घेतले होते.
सपोनि शंकर धायगुडे या गुन्ह्याचा तपास करीत असताना, ०६ जून रोजी त्या गुन्ह्यामधील प्रवाशांना दमदाटी व धक्काबुक्की करुन जबरदस्तीने पैसे काढून घेणारे जुना पुना नाका, येथील ब्रीजखाली नाल्याजवळ काळ्या-पिवळ्या रंगाची रिक्षा MH13/CT8170 लाऊन जुना पुना नाका येथील नाल्याखालील रोडवर थांबले असल्याची खात्रीशीर बातमी मिळाली.
सपोनि धायगुडे गुन्हे प्रकटीकरण पथकातील अंमलदार दोन पंचासह पंचनामा करण्याकरिता लागणारे साहित्य घेऊन खाजगी वाहनाने कारवाईकामी जुना पुना नाका येथील नाल्याजवळ गेले असता, त्या ठिकाणी तिघे रिक्षात बसून पोलीसांना पाहताच पळून जाऊ लागले. त्यांना पोलीसांनी शिताफीने ताब्यात घेतले.
त्यांची नांवे शिवम चंद्रकांत अलकुंटे (वय-२५ वर्षे, धंदा-मजुरी, रा. बुधवार पेठ, वडार गल्ली, सोलापूर), अभिजीत रमेश जाधव (वय-३१ वर्षे, धंदा-रिक्षा चालक, रा.४०६ उत्तर कसबा, कैकाडी गल्ली, सोलापूर) आणि अभिषेक नागनाथ अडगळे (वय-२१ वर्षे, धंदा-खाजगी नोकरी, रा.१०२/सी भवानी पेठ, सोलापूर) अशी असल्याचे चौकशीअंती स्पष्ट झाले. त्यानंतर रिक्षाचे मालकी हक्क व कागदपत्रांबाबत विचारणा केली असता, ती रिक्षा अभिजीत जाधव याच्या मालकीची असल्याचे सांगितले.
त्यांच्या अंगझडती व रिक्षाची झडती घेतली असता, या आरोपींकडे मोबाईल, रोख रक्कम, स्टीलचा रॉड, लोखंडी फायटर असे एकूण ३,९८,६५० रुपये किमंतीचा मुद्देमाल मिळून आला. त्यावेळी त्यांचेकडे या मुद्देमालासंबंधी चौकशी केली असता, त्यांचा त्या गुन्ह्यात सहभाग असल्याचे निष्पन्न झाल्याने त्यांना गुरुवारी, ६ जून रोजी १९.३० वा. अटक करण्यात आलीय.
ही कामगिरी पोलीस आयुक्त एम. राजकुमार, पोलीस उपआयुक्त (परिमंडळ) विजय कबाडे, सहा. पोलीस आयुक्त (विभाग-१) अशोक तोरडमल, वपोनि दिलीप शिंदे, दुपोनि विकास देशमुख यांच्या मार्गदर्शनाखाली गुन्हे प्रकटीकरण पथकाचे प्रमुख सहाय्यक पोलीस निरीक्षक शंकर धायगुडे, पोह अजय पाडवी, पोह प्रविण चुंगे, पोना आयाज बागलकोटे, पोना शिवानंद भिमदे, पोकॉ कृष्णा बडुरे, पोकॉ विनोद व्हटकर, पोकॉ विनोदकुमार पुजारी, पोकॉ सचिनकुमार लवटे, पोकॉ नितीन मोरे, पोकॉ अजय चव्हाण, पोकॉ अमोल खरटमल, पोकॉ पंकज घाडगे, पोकॉ सुधाकर माने, पोकॉ अतिश पाटील, पोकॉ अर्जुन गायकवाड, पोकॉ शशिकात दराडे, पोकॉ तोसीफ शेख यांनी पार पाडली.
