सोलापूर : शहरातील सदर बझार पोलीस ठाणे हद्दीतील सराईत गुन्हेगार आदित्य ऊर्फ पोत्या बसवराज दोडमणी, (वय २७ वर्षे, रा. विजापूर रोड, नडगेरी पेट्रोलपंप जवळ, सोलापूर) हा मागील काही वर्षापासून सातत्याने घातक शस्त्राचा वापर करुन मोटार सायकल चोरी, घरफोडी, दगडफेक करणे यासारखे गंभीर स्वरुपाचे गुन्हे साथीदारांच्या मदतीने, अवैध आर्थिक फायदा मिळवण्यासाठी करीत आला आहे. त्याच्याविरुध्द गंभीर स्वरुपाचे ११ गुन्हे सोलापूर शहरात दाखल आहेत. त्यास १२ जून रोजी एमपीडीए कायद्यान्वये स्थानबध्द करण्यात आले.
त्याचे गुन्हेगारी कृत्यामुळे सोलापुर शहरातील नागरिकांचे दैनंदिन जीवन विस्कळीत होऊन, सार्वजनिक सुव्यवस्थेस बाधा निर्माण झाली आहे. आदित्य ऊर्फ पोत्या दोडमणी याच्या गुन्हेगारी कृत्यामुळे, त्याची सोलापुर शहरातील व्यापारी व सामान्य नागरीकांमध्ये दहशत असून, त्याच्याविरुध्द सामान्य नागरीक उघडपणे पोलीसांना माहीती देत नाहीत, असं पोलिसांचं म्हणणे आहे.
आदित्य ऊर्फ पोत्या यास त्याच्या गुन्हेगारी कारवायापासून परावृत्त करण्यासाठी सन २०२३ मध्ये क.११० (ई) (ग) फौ.प्र.सं. अन्वये प्रतिबंधक कारवाई करण्यात आली होती. त्यानंतरही आदित्य ऊर्फ पोत्या बसवराज दोडमणी याच्या वर्तनात कोणताच बदल झाला नाही. त्याने सार्वजनिक सुव्यवस्थेस बाधा होईल, अशी गुन्हेगारी कृत्य चालू ठेवली.
त्यामुळे त्याचे गुन्हेगारी कृत्यास वेळीच प्रतिबंध करण्यासाठी पोलीस आयुक्त एम. राज कुमार यांनी १० जून २०२४ रोजी त्याच्याविरुध्द एमपीडीए अधिनियम, १९८१ चे कलम ३ अन्वये स्थानबध्दतेचे आदेश निर्गमित करुन १२ जून रोजी स्थानबध्द आदेशाची बजावणी करुन, येरवडा कारागृह, पुणे येथे दाखल करण्यात आले.
ही कारवाई पोलीस आयुक्त एम. राज कुमार यांच्या मार्गदर्शनाखाली, पोलीस उप-आयुक्त (गुन्हे/विशा) डॉ. दीपाली काळे, पोलीस उप-आयुक्त (परिमंडळ) विजय कबाडे, सहाय्यक पोलीस आयुक्त (गुन्हे) प्रांजली सोनवणे, सहाय्यक पोलीस आयुक्त (विभाग-०२) अजय परमार, वरिष्ठ पोलीस निरीक्षक (गुन्हे) सुनिल दोरगे, वपोनि अजित लकडे (सदर बझार पोलीस ठाणे), पोनि भालचंद्र ढवळे (सदर बझार पोलीस ठाणे), पोउपनि विशेंद्रसिंग बायस (गुन्हे शाखा), एमपीडीए पथकातील अंमलदार पोहेकॉ-/८३३ विनायक संगमवार, पोहेकॉ/१२५४ सुदीप शिंदे, पोशि/१९१६ अक्षय जाधव, पोशि/६५४ विशाल नवले यांनी पार पाडली.
