सोलापूर : जबरी चोरी, घरफोडी, मोटार सायकल चोरी करणारा सराईत गुन्हेगार नितीन ऊर्फ निखील मारुती कांबळे (वय-३३ वर्षे) याला एमपीडीए अन्वये स्थानबध्द करण्यात आलंय. त्याच्याविरुध्द गंभीर स्वरुपाचे २० गुन्हे सोलापूर शहरात दाखल आहेत. त्यास गुन्हेगारी कृत्यापासून परावृत्त करण्यासाठी तीन वेळा प्रतिबंधात्मक कारवाई करण्यात आली होती, मात्र त्याच्या त कोणत्याही स्वरूपाचा सुधार न आल्याने एमपीडीए अन्वये स्थानबद्ध करण्यात आल्याचे सांगण्यात आले.
सोलापूर शहरातील विजापूर नाका, सदर बझार, एमआयडीसी आणि सलगर वस्ती पोलीस ठाणे हद्दीतील सराईत गुन्हेगार, नितीन ऊर्फ निखील मारुती कांबळे ( रा. भिम नगर, सोरेगांव) हा मागील काही वर्षापासून सातत्याने घातक शस्त्राचा वापर करुन गैरकायद्याची मंडळी जमविणे, मारामारी, दगडफेक, खंडणी मागणे, जबरी चोरी, विनयभंग, दुखापत, घरफोडी, मोटार सायकल चोरी आणि धमकी देणे यासारखे गंभीर स्वरुपाचे गुन्हे साथीदारांच्या मदतीने, अवैध आर्थिक फायदा मिळवण्यासाठी करीत आला आहे.
त्यामुळे त्याच्या गुन्हेगारी कृत्यास वेळीच प्रतिबंध करण्यासाठी पोलीस आयुक्त एम. राजकुमार यांनी, बुधवारी, ०३ मार्च रोजी त्याच्याविरुध्द एमपीडीए अधिनियम, १९८१ चे कलम ३ अन्वये स्थानबध्दतेचे आदेश निर्गमित करुन, त्यास स्थानबध्द आदेशाची बजावणी करुन येरवडा कारागृह, पुणे येथे दाखल करण्यात आलंय.
ही कारवाई पोलीस आयुक्त एम. राजकुमार यांच्या मार्गदर्शनाखाली, पोलीस उप-आयुक्त (गुन्हे/विशा) डॉ. दीपाली काळे, पोलीस उप-आयुक्त (परिमंडळ) विजय कबाडे, सहाय्यक पोलीस आयुक्त (गुन्हे) प्रांजली सोनवणे, सहाय्यक पोलीस आयुक्त (विभाग-०२) अजय परमार, वरिष्ठ पोलीस निरीक्षक (गुन्हे) सुनिल दोरगे, विजापुर नाका पोलीस ठाण्याचे वरिष्ठ पोलीस निरीक्षक दादा गायकवाड, पोउपनि विशेंद्रसिंग बायस व एमपीडीए पथकातील अंमलदार पोहेकॉ ८३३, विनायक संगमवार, पोहेकॉ १२५४, सुदीप शिंदे, पोशि १९१६, अक्षय जाधव, पोशि ६५४, विशाल नवले यांनी पार पाडली.
