अकलूज : अकलूज ची लावणी सम्राज्ञी प्रमिला लोदगेकर सूर्यवंशी यांना नवी दिल्ली येथील भारत सरकारच्या नाट्यसंगीत अकॅडमीचा "उस्ताद बिस्मिल्ला खान युवा रत्न पुरस्कार" जाहीर झाल्याचे भारत सरकारच्या प्रसिद्धी विभागाकडून जाहीर करण्यात आलंय. पत्रकात सन २०२२-२३ चे पुरस्कार जाहीर करण्यात आले त्यामध्ये प्रमिला लोदगेकर यांनी लावणी क्षेत्रात केलेल्या उल्लेखनीय कामगिरीबद्दल त्यांना हा पुरस्कार जाहीर झाला आहे. पुरस्काराचे वितरण नवी दिल्ली येथे होणार आहे.
अकलूज लावणी स्पर्धेत सलग तीन वर्ष प्रथम क्रमांक मिळवून हॅट्रिक केली. अकलूज लावणी स्पर्धेचा मानाचा सहकार महर्षी शंकरराव मोहिते-पाटील लावणी कलावंत पुरस्कार याचबरोबर गोवा येथे भास्कर भूषण यांचा प्राईड ऑफ इंडिया तसेच महाराष्ट्र साहित्य परिषदेचा लावणी कलावंत पुरस्कार अखिल भारतीय नाट्य परिषदेचा ही मानाचा पुरस्कार मिळाला. याचबरोबर अनेक पुरस्काराने प्रमिलाला लोदगेकर यांना सन्मानित करण्यात आलं आहे.
त्यांना भारत सरकार च्या वतीने चीन व दुबई येथे 'महाराष्ट्राची लोक कला' या कार्यक्रमामध्ये महाराष्ट्राची पारंपारिक लावणी सादर करण्याचा मान मिळाला होता. आजही लावणी प्रशिक्षक व नवीन कलावंतांना मार्गदर्शन करण्याचे काम त्या करीत आहेत. पुरस्कार जाहीर झाल्याबद्दल सर्व स्तरावर त्यांचं अभिनंदन केलं जात आहे. प्रमिला लोदगेकर यांना पुरस्कार जाहीर झाल्याबद्दल अकलूज लावणी स्पर्धेचे संस्थापक अध्यक्ष जयसिंह मोहिते पाटील यांनी त्यांचं अभिनंदन केलं आहे.
