रायगड-खोपोली पोलीसांची लक्षवेधी कामगिरी ... !
१०७ कोटी रुपयांचे एम.डी. ड्रग्ज हस्तगत, तिघे गजाआड
रायगड : खोपोली पोलीस ठाण्याच्या पोलीस अधिकाऱ्यांना मिळालेल्या गोपनीय माहितीनुसार रायगड पोलीस आणि खोपोली पोलीस ठाण्याच्या अधिकारी कर्मचाऱ्यांनी टाकलेल्या संयुक्त छाप्यात 107 कोटी रुपयांचे एमडी ड्रग्स हस्तगत करण्यात आले याप्रकरणी तिघांना गजाआड करण्यात आलं आहे. अलीकडच्या काळात अमली पदार्थ विरोधी पोलीस कामगिरीत छापे टाकली जात आहेत त्यावरून माफियांचं अंमली पदार्थ निर्मिती व वितरणाचं मोठे जाळे राज्यात कार्यरत असल्याचे पुन्हा उजेडात आले आहे.
अगदी अलीकडच्या काळात सोलापूर, मोहोळ येथील औद्योगिक वसाहतीत महाराष्ट्र पोलिसांनी टाकलेल्या छाप्यात मोठ्या प्रमाणात एम.डी. ड्रग्ज आणि त्यासाठी लागणारा कच्चा माल असा कोट्यावधींचा अंमली पदार्थ साठा पोलिसांच्या हाती लागला. मुंबई पोलीस आणि सोलापूर ग्रामीण पोलिसांच्या कामगिरीनंतर रायगड खोपोली पोलिसांनी अमली पदार्थ विरोधी केलेली कारवाई लक्षवेधी मानली जात आहे.
खोपोली पोलीस ठाणे हद्दीतील मौजे ढेकू गांवच्या हद्दीत इंडीया इलेक्ट्रीक पोल्स मॅन्युफॅक्चरींग कंपनी या नावाचा बोर्ड लावून आतमध्ये मात्र अंचल केमिकल या नावाने केमिकल बनवण्याचा व्यवसाय करणाऱ्या कंपनीमध्ये प्रतिबंधीत, अंमली पदार्थ बेकायदेशीरपणे तयार केले जात असल्याची खोपोली पोलीस स्टेशनचे पोलीस अंमलदार यांना गोपनीय माहीती प्राप्त झाली. त्यांनी ही बाब वरीष्ठांना कळवून त्यांच्या मार्गदर्शनाखाली पुढील कायदेशीर कारवाईच्या अनुषंगाने मार्गदर्शन व सुचना प्राप्त करुन उपविभागीय पोलीस अधिकारी, खालापुर विक्रम कदम व खोपोली पोलीस स्टेशनचे वरीष्ठ पोलीस निरीक्षक शितल राऊत व खोपोली पोलीस स्टेशनचे अधिकारी व अंमलदार यांनी अंचल कंपनीत छापा घातला.
गुरुवारी, ०७ डिसेंबर रोजी पोलीस पथकाने त्या कंपनीत प्रवेश केल्यानंतर कंपनीचे चालकांकडे त्या ठिकाणी रासायनिक पदार्थ निर्मिती करण्यासाठीचा शासनाचा कोणताही वैध परवाना मिळून आला नाही. त्या ठिकाणी उग्र वास येत असल्याचे व काही कच्चा माल, तसेच त्याचेवर प्रक्रीया करण्यासाठी आवश्यक साधन सामग्री असेंबल केल्याचे दिसून आले. यामध्ये गुंगीकारक औषधी द्रव्ये आणि मनोव्यापारांवर परीणाम करणारे पदार्थ अधिनियमातील तरतुदीप्रमाणे कारवाई सुरु करण्यात आली.
याबाबत तयार पक्का माल असलेली पावडर ही नार्को इन्स्पेक्शन कीट (Narco Inspection kit) द्वारे तपासणी केली असता सदर तयार केलेला माल हा एम. डी. म्हणजेच मेफेड्रॉन (Mephedrone) असल्याचे निष्पन्न झाले.
या छाप्यात, १०६ कोटी, ५० लाख रूपये किंमतीची एकूण ८५ किलो २०० ग्रॅम वजनाची एम. डी. पावडर, १५,३७,३७७ रुपये किंमतीची एम. डी. पावडर बनवण्यासाठी वापरण्यात येणारी रसायने तसेच कच्चा माल आणि ६५ लाख रुपये किंमतीची रासायनिक प्रक्रीयेसाठी असेंबल केलेली साधन सामग्री ताब्यात घेतली. या सर्व मुद्देमालाची एकूण किंमत १०७ कोटी ३० लाख ३७ हजार ३७७ रुपये (अक्षरी रुपये एकशे सात कोटी तीस लाख सदतीस हजार तीनशे सत्याहत्तर मात्र ) असून हा मुद्देमाल व मालमत्ता जप्त करुन सील करण्यात आला. आहे. या कारवाईमध्ये तीन आरोपींना ताब्यात घेण्यात आलं असून ती बेकायदेशीर कंपनीदेखील सील करण्यात आलीय.
ही कारवाई विशेष पोलीस महानिरीक्षक प्रविण पवार
(कोकण परीक्षेत्र), पोलीस अधिक्षक, सोमनाथ घार्गे
(रायगड), अपर पोलीस अधिक्षक अतुल झेंडे
(रायगड) यांच्या मार्गदर्शनाखाली उपविभागीय पोलीस अधिकारी, खालापुर विक्रम कदम यांचे नेतृत्वाखाली वरीष्ठ पोलीस निरीक्षक शितल राऊत, सहा. पोलीस निरीक्षक हरेश काळसेकर, प्रविण स्वामी, पोलीस उपनिरीक्षक सुधाकर लहाने, अभिजीत व्हरांबळे, पोहवा/ २०७२ राजेंद्र पाटील, पोहवा/२१३० सागर शेवते, पोहवा /१०८६ प्रसाद पाटील, मपोहवा/५३ आर.एन. गायकवाड, पोना/२२७४ सतीष बांगर, पोना/११३५ कुंभार, पोशि/५६६ आर.डी. चौगुले, पोशि/४५६ राम मासाळ, पोशि/१८४९ प्रदीप खरात यांनी पार पाडली.
पोलीस पथकाने सतत २४ तास परिश्रम घेऊन ही कारवाई पुर्ण केली. याबाबत खोपोली पोलीस ठाण्यात, गुंगीकारक औषधी द्रव्ये आणि मनोव्यापारांवर परीणाम करणारे पदार्थ अधिनियम १९८५ चे कलम ८(c), २२(c) सह कलम २९ प्रमाणे गुन्हा दाखल करण्यात आला असून वरीष्ठ पोलीस निरीक्षक शितल राऊत या गुन्ह्याचा अधिक तपास करीत आहेत, असं रायगड पोलीस अधीक्षक कार्यालयाचे जनसंपर्क अधिकाऱ्यांनी एका प्रसिद्धी पत्रकान्वये सांगितले.
