सिद्धेश्वर सह. बँकेच्या सुवर्ण महोत्सवी कार्यक्रमांतर्गत हृदयस्पर्शी कार्यक्रम
सोलापूर : कोणताही बाप आपल्या मुला-मुलींना दर्जेदार शिक्षण मिळावे, अंगावर चांगले कपडे असावेत, त्यांची चप्पलसुद्धा फाटकी-तुटकी असू नये, याची काळजी घेतो. स्वतः हलाखीचे जीवन जगत पाल्यांसाठी आयुष्यभर खस्ता खाणाऱ्या बापाला आपल्यामुळे कुठेही खाली बघायची वेळ येणार नाही, याची खबरदारी मुलींनी आणि मुलांनी घेतली पाहिजे, असे परखड मत सुप्रसिद्ध युवा व्याख्याते व प्रेरणादायी वक्ते प्रा. वसंत हंकारे यांनी व्यक्त केले.
कै. वि.गु. शिवदारे कॉलेज प्रांगणात सिद्धेश्वर सहकारी बँकेच्या सुवर्ण महोत्सवी वर्ष कार्यक्रमांतर्गत सिद्धेश्वर सहकारी बँक आणि सिद्धेश्वर बँक सेवक सांस्कृतिक मंडळ यांच्या संयुक्त विद्यमाने आयोजित कार्यक्रमांत व्यासपीठावर श्री स्वामी समर्थ सुत गिरणीचे चेअरमन राजशेखर शिवदारे, कार्यक्रमाचे अध्यक्ष प्रा. ए. डी. जोशी, माजी नगरसेवक शिवलिंग कांबळे प्रमुख पाहुणे व बँकेचे चेअरमन प्रकाश वाले, व्हा. चेअरमन नरेंद्र गंभिरे, सरव्यवस्थापक तथा सेवक सांस्कृतिक मंडळाचे अध्यक्ष राम शर्मा उपस्थित होते.
यावेळी वसंतराव हंकारे व नुकतेच देश पातळीवर UPSC अंतर्गत इंडियन इंजिनीअरींग सर्व्हिसेस मध्ये उत्तीर्ण झालेले प्रसन्न प्रभू कत्ते यांचा व अतिथींचा सत्कार करण्यात आला.
पुढे बोलताना हंकारे म्हणाले की, तुम्ही कोण आहात? माझा बाप कोण आहे? माझा बाप माझ्यासाठी काय करतो? याचा विचार प्रत्येक मुलीने अंतर्मुख होऊन केला पाहिजे. एकदा तरी बाप झोपल्यावर रात्रीच्या दोन वाजता उठून त्याच्याकडे बघा. त्याच्या पॅन्ट व बनियनला चार जागेवर ठिगळं दिसतील. मात्र तोच बाप तुम्हाला फॅन्सी व नवनवीन कपडे घालून शाळेत व कॉलेजला पाठवतो. आता आम्हाला प्रबोधनाची गरज नाही, असा विचार न करता, तुमच्या आयुष्यात जो बदल घडणार आहे, त्याला परिवर्तन म्हणतात. ते परिवर्तन झालं पाहिजे, प्रत्येक व्यक्ती बदलला पाहिजे, प्रत्येक लेकराच्या काळजामध्ये परिवर्तनाची आग लागली पाहिजे. २१ व्या शतकामध्ये मोबाईलमुळे पूर्ण पिढी बिघडत चालली असल्याची भीती त्यांनी व्यक्त केली.
त्याचबरोबर मुलींसोबतच मुलांमध्ये परिवर्तन घडवण्यासाठी हंकारे यांनी गौतम बुद्ध, राजमाता जिजाऊ, छत्रपती शिवाजी महाराज, छत्रपती संभाजी महाराज, भगतसिंग, फुले-शाहू-आंबेडकर, सावित्रीआई फुले, ताराराणी, अण्णाभाऊ साठे आदी महापुरुषांचा अंगावर शहारे आणणारा आणि क्रांतीची मशाल पेटवणारा इतिहास सादर केला.
सावित्रीच्या लेकींनो स्वतःच्या मनाला विचारा, स्वतः उपाशीपोटी, उघड-नागडं वावरत रक्ताचं पाणी करून तुम्हाला शिकवणारा तुमचा बाप समजून घ्याल का? खरंच तुम्हाला बाप समजला का? अशी काळजाला भिडणारी आर्त साद त्यांनी मुला-मुलींना घातली. शेवटी बोलताना हंकारे यांनी सांगितले की, शाळेत चार मार्क कमी पडले तरी चालतील, पण वाघासारख्या बापाला आयुष्यात कधीही मान खाली घालायला लावू नका.
'बाप समजावून घेताना' या विषयावर बोलत असताना अनेक उदाहरणे, काळजाला भिडणारे शब्द व प्रखर विचार आपल्या परिवर्तनवादी शब्दातून हंकारे यांनी मांडले. यावेळी उपस्थित विद्यार्थिनी, बहुसंख्येने आलेला पालकवर्ग, महिला अक्षरशः ढसाढसा रडत होत्या.
कार्यक्रमाच्या शेवटी सर्वं मुला-मुलींना डोक्यावर हात ठेऊन डोळे बंद करायला लावले, त्यानंतर आपल्या बापाला आठवा आणि बाबा मी तुमची मान कधीच खाली होऊ देणार नाही. समाजापुढे तुम्हाला मान खाली घालून वागावे लागेल, असे कृत्य मी कधीच करणार नाही. अशी शपथ प्रा. हंकारे यांनी यावेळी विद्यार्थी-विद्यार्थ्यांनींना घ्यायला लावली.
बँकेचे व्हा. चेअरमन नरेंद्र गंभिरे यांनी या कार्यक्रमास सोलापूर शहरातील शाळा कॉलेजचे मुख्याध्यापक, प्राचार्य, शिक्षक, प्राध्यापक, पालक व सर्व उपस्थितांचे आभार मानले.
सदर कार्यक्रमास बँकेचे संचालक मंडळ उपस्थित होते. या कार्यक्रमास दक्षिण सोलापूर तालुका शिक्षण मंडळ संचलित सर्व विभागाच्या कर्मचाऱ्यांनी व बँकेच्या कर्मचाऱ्यांनी परिश्रम घेतले. कार्यक्रमाचे सूत्रसंचालन बसवराज कोरवार यांनी केले.
