नागरिकांनी इंधन व गॅस सिलेंडरची अतिरिक्त साठवणूक न करण्याचे आवाहन
कोणत्याही अफवावर विश्वास न ठेवता नागरिकांनी प्रशासनाला करावं सहकार्य
सोलापूर/11मार्च : जिल्हा प्रशासनाची बीपीसीएल, एचपीसीएल व आयओसीएल या इंधन व गॅस पुरवठा करणाऱ्या कंपनीशी चर्चा झालेली आहे. त्यामुळे सोलापूर जिल्ह्यामध्ये पेट्रोल, डिझेल व गॅस सिलेंडरचा कुठेही तुटवडा भासणार नाही. या अनुषंगाने जिल्ह्यातील नागरिकांनी पेट्रोल, डिझेल व गॅस सिलेंडरची अतिरिक्त साठवणूक करू नये. तसेच कोणत्याही अफवावर विश्वास ठेवू नये आणि प्रशासनाला सहकार्य करावे, असे आवाहन प्रभारी जिल्हाधिकारी तथा मुख्य कार्यकारी अधिकारी कुलदीप जंगम यांनी केले आहे.
प्रभारी जिल्हाधिकारी जंगम पुढे म्हणाले की, सोलापूर जिल्ह्यात मागणी प्रमाणे गॅसचा पुरवठा होणार आहे. तरी जिल्ह्यातील नागरिकांनी कोणत्याही अफवावर विश्वास न ठेवता गॅस सिलेंडरचा साठा करून ठेवू नये. गॅस पुरवठा कंपन्या व त्यांच्या एजन्सी यांच्याशी जिल्हा प्रशासन सातत्याने संपर्कात असून मागणीप्रमाणे गॅस पुरवठा होणार असल्याचे त्यांनी सांगितले.
जिल्हा प्रशासनाच्या वतीने जिल्हा पुरवठा अधिकारी यांनी जिल्ह्यातील गॅस कंपनीचे समन्वय अधिकारी यांची तातडीची बैठक घेऊन गॅस सिलेंडर वाटप नियोजनाचा आढावा घेतलेला आहे. जिल्ह्यात एकूण 94 गॅस एजन्सी कार्यरत आहेत. यामध्ये बीपीसीएल 54, एचपीसीएल 20 व आयओसीएल 20 अशा गॅस एजन्सी आहेत.
आखाती युद्धाच्या पार्श्वभूमीवर या गॅस एजन्सी मार्फत गॅस सिलेंडर वितरण नियमांमध्ये बदल करण्यात आले आहेत, अशी माहिती संबंधित गॅस कंपनी समन्वय अधिकारी यांनी दिली. हे बदल खालील प्रमाणे...
1. गॅस एजन्सीमार्फत व्यावसायिक तत्त्वावर पुरविण्यात येणाऱ्या सर्व गॅस सिलेंडरचे बुकींग पुर्णतः बंद केलेले आहे.
2. शासकीय संस्था, रुग्णालय, एनटीपीसी, अन्नछत्र मंडळ यांना वरील नियमामधून सूट देण्यात आलेली आहे.
3. व्यावसायिक तत्त्वावर पुरविण्यात येणाऱ्या गॅस सिलेंडर बाबत उच्चस्तरीय चर्चा करणेत येत असून सर्व बार्बीचा विचार करून यावर निर्णय घेणेत येईल.
4. घरगुती गॅस सिलेंडर बुक केलेनंतरचा प्रतिक्षा कालावधी 25 दिवसांचा करणेत आलेला आहे.
5. घरगुती गॅस सिलेंडर वितरीत करताना कंपनीमार्फत पुरविण्यात येणाऱ्या OTP ची खातरजमा करणेत येत आहे. गॅस सिलेंडरचा दुरुपयोग होऊ नये, याकरीता OTP पडताळणी अनिवार्य करणेत आलेली आहे. तसेच EKYC ही करण्यात येईल.
जिल्हा पुरवठा कार्यालयामार्फत गॅस सिलेंडर वितरण नियंत्रित करणे करीता तसेच काळाबाजार रोखण्याकरीता तालुकास्तरीय दक्षता पथक गठीत करणेत आलेले आहे. सदर दक्षता पथकांना गॅस एजन्सीच्या तपासण्या करून दैनंदिन गॅस सिलेंडर आवक जावक वर नियंत्रण ठेवण्याबाबत निर्देशित करणेत आलेले आहे.
सोलापूर जिल्ह्याची घरगुती गॅस ग्राहकांची माहे फेब्रुवारी 2026 अखेर एकुण संख्या 11,88,258 इतकी आहे. सोलापूर जिल्ह्याची व्यावसायिक गॅस ग्राहकांची माहे फेब्रुवारी 2026 अखेर एकुण संख्या 10,800इतकी आहे. सोलापूर जिल्ह्याकरीता घरगुती गॅस ची दैनंदिन गरज 250 मे. टन इतकी असून व्यावसायिक गॅस ची 10 मे. टन इतकी आहे, अशी माहिती जिल्हा पुरवठा अधिकारी संतोष सरडे व अन्नधान्य वितरण अधिकारी ओंकार पडोळे यांनी दिली आहे.
