सोलापूर/02 जून : कॉर्पोरेट सामाजिक उत्तरदायित्व (CSR) उपक्रमांतर्गत एक महत्त्वपूर्ण पाऊल उचलताना, एनटीपीसी, सोलापूरने सोलापूर महानगरपालिका (SMC) संचालित महात्मा गांधी प्राणी संग्रहालयाला ₹२.७९ कोटींचा धनादेश सुपूर्द केला. ही मदत काळवीट, बिबट्या, सिंह आणि मोर यांच्यासाठी नवीन व सुधारित पिंजरे आणि निवास व्यवस्था उभारण्यासाठी देण्यात आली आहे, ज्यामुळे संग्रहालयाची गुणवत्ता आणि पर्यटकांचा अनुभव दोन्ही लक्षणीयरित्या सुधारेल.
या उपक्रमामुळे प्राणी संग्रहालयाच्या आधुनिकीकरण आणि पुनरुज्जीवन प्रक्रियेला चालना मिळून, ते एक महत्त्वपूर्ण शैक्षणिक, पर्यावरणीय आणि पर्यटन केंद्र म्हणून विकसित होण्याच्या दिशेने वाटचाल करेल.
कार्यक्रमाची सुरुवात सोलापूर महानगरपालिकेचे पशुवैद्यकीय अधिकारी आणि प्राणी संग्रहालय विभागाचे प्रमुख डॉ. सतीश एस. चौगुले यांच्या स्वागत भाषणाने झाली. त्यांनी प्रकल्पाच्या उद्दिष्टांची माहिती दिली आणि आयुक्त डॉ. सचिन ओंबसे यांच्या नेतृत्वाची व दूरदृष्टीची प्रशंसा केली.
एनटीपीसी सोलापूरच्या शिष्टमंडळात कार्यकारी संचालक बी. जे. सी. शास्त्री, मानव संसाधन प्रमुख मनोरंजन सरंगी, पर्यावरण विभाग प्रमुख रफिकुल इस्लाम, उप महाव्यवस्थापक (HR) सौ. कविता गोयल, उप महाव्यवस्थापक (P&S) अमित सिंह, कॉर्पोरेट कम्युनिकेशन प्रमुख कु. अर्चना पाठक, गुरुदत्त शर्मा व इतर कर्मचारी सहभागी झाले होते.
सोलापूर महानगरपालिकेच्या वतीने आयुक्त डॉ. सचिन ओंबासे, उप आयुक्त किरणकुमार मोरे, सहाय्यक आयुक्त गिरीश पंडित, उप अभियंता किशोर सातपुते व प्राणी संग्रहालयातील कर्मचारी उपस्थित होते.
आयुक्त डॉ. ओंबासे यांनी एनटीपीसीच्या टीमचे पुष्पगुच्छ देऊन स्वागत केले आणि आपल्या भाषणात या उदार सीएसआर मदतीबद्दल एनटीपीसी सोलापूरचे आभार मानले. त्यांनी सांगितले की, ही आर्थिक मदत काळवीट, बिबट्या, सिंह आणि मोर यांचे पिंजरे व निवासस्थाने उभारण्यासाठी उपयुक्त ठरेल. तसेच, एनटीपीसीच्या सहकार्याने प्राणी संग्रहालय परिसरासह सोलापूर शहरातील मोकळ्या जागांमध्ये वृक्षारोपण मोहीम राबविण्याचेही त्यांनी आवाहन केले.
मानव संसाधन विभाग प्रमुख मनोरंजन सरंगी व पर्यावरण विभाग प्रमुख रफिकुल इस्लाम यांनीही उपस्थितांना संबोधित केले आणि एनटीपीसीच्या शाश्वतता, सामाजिक बांधिलकी व समुदाय सहभागाच्या मूल्यांशी सुसंगत अशा उपक्रमांना कायम पाठिंबा देण्याचे आश्वासन दिले.
या प्रसंगी बी. जे. सी. शास्त्री, डॉ. सचिन ओंबासे, मनोरंजन सरंगी आणि रफिकुल इस्लाम आदी प्रमुख पाहुण्यांच्या हस्ते आंब्याच्या रोपांचे वृक्षारोपण करून पर्यावरण संवर्धनाचा प्रतिकात्मक संदेश देण्यात आला.
कार्यक्रमाचा समारोप डॉ. सतीश एस. चौगुले यांच्या आभार प्रदर्शनाने झाला. त्यांनी एनटीपीसी व महापालिकेच्या सर्व अधिकारी व कर्मचाऱ्यांचे मनःपूर्वक आभार मानले आणि अमित सिंह, कु. अर्चना पाठक तसेच समर्पित प्राणी संग्रहालय कर्मचाऱ्यांचे विशेष उल्लेख करून त्यांच्या समन्वयासाठी धन्यवाद दिले.
ही सहकार्याची पुढाकार घेणारी भागीदारी एनटीपीसी सोलापूर व सोलापूर महानगरपालिकेतील दृढ व दूरदृष्टीपूर्ण संबंधांचे प्रतिक आहे. या उपक्रमाद्वारे महात्मा गांधी प्राणी संग्रहालयाच्या माध्यमातून वन्मजीव संवर्धन, पर्यावरण शिक्षण व जनतेसाठी मनोरंजनाच्या क्षेत्रात दीर्घकालीन सुधारणा घडून येतील, असा विश्वास यावेळी व्यक्त करण्यात आला.
