९० विद्यार्थ्यांना 'लोकशाही' च्या वतीने चष्म्याची फ्रेम मोफत
सोलापूर : येथील शिक्षण महर्षी स्व. विष्णुपंत तात्यासाहेब कोठे यांच्या ८७ व्या जयंतीनिमित्त जुनी मिल आवारातील संभाजीराव शिंदे विद्या मंदिरात विद्यार्थ्यांची आरोग्य तपासणी करण्यात आली. या शिबिरामध्ये ८४२ विद्यार्थ्यांची दंत तपासणी, नेत्र तपासणी, रक्त तपासणी व धनुर्वात प्रतिबंधक लसीकरण करण्यात आले. नेत्र चिकित्सा शिबीरात तपासणी केलेल्या २०० विद्यार्थ्यांपैकी चष्मा आवश्यक ९० विद्यार्थ्यांना चष्म्याच्या फ्रेम लोकशाही फाउंडेशनच्या वतीने मोफत देण्यात येणार असल्याचे वसीम राजा बागवान यांनी यावेळी सांगितले.
यावेळी बोलताना संस्था संचालिका डॉ. सौ. राधिका चिलका मॅडम यांनी स्व. तात्यासाहेबांच्या शैक्षणिक, सामाजिक राजकीय व आध्यात्मिक कार्याचा उल्लेख करून सदर शिबिरास शुभेच्छा दिल्या.
स्व. तात्यासाहेबांच्या स्मृतिंना उजाळा देत डॉ. अण्णासाहेब लोखंडे यांनी तात्यांच्या कार्याचा गौरव करत विद्यार्थ्यांना आरोग्यविषयक मार्गदर्शन केले. यावेळी शाळेच्या वतीने मान्यवरांचे स्वागत व सत्कार करण्यात आले.
या आरोग्य शिबिरात नेत्रासंबंधी तक्रार असलेल्या २०० हून अधिक विद्यार्थ्यांची नेत्र चिकित्सा करण्यात आली, त्यापैकी ९० विद्यार्थ्यांना चष्मा गरजेचा असल्याने त्या सर्व विद्यार्थ्यांना चष्म्याची फ्रेम लोकशाही फाऊंडेशनच्या वतीने मोफत दिली जाणार असल्याचे लोकशाही फाऊंडेशनचे वसिम राजा बागवान यांनी यावेळी सांगितले . कार्यक्रमाचे स्वागत, प्रास्ताविक व सूत्रसंचालन बिभीषण सिरसट सर यांनी केले तर मुख्याध्यापक नागेश कुमार काटकर सर यांनी सर्व उपस्थितांचे आभार मानले.
हा कार्यक्रम यशस्वी करण्यासाठी डॉ. दीनदयाळ उपाध्याय दंत महाविद्यालय, केगांव, प्राथमिक आरोग्य केंद्र देगांव, दंत परिषद सोलापूर, लोकशाही फाउंडेशन सोलापूर यांचे सहकार्य लाभले. मुख्याध्यापिका सौ. राजश्री नारायणकर, सर्व शिक्षक व शिक्षकेतर कर्मचारी यांनी शिबिराच्या यशस्वीतेसाठी परिश्रम घेतले.
